سەردێر

دژی بەشێك لە فەرمانبەران، سكاڵا تۆمار دەكرێت

سلێمانی – نزار جەزا

 

ڕێكخراوێك یاداشتێكی پێشكەش بەداواكاری گشتی كرد و داوای كرد ڕێگری لەو فەرمانبەرانە بكرێت، كە پلەیان لەخوار حەوتەوەیە و زیاتر لەكارێك دەكەن.

سامی ساتی پارێزەر لە كۆنفڕانسێكی ڕۆژنامەوانیدا ڕایگەیاند، ئەمڕۆ وەك ڕێكخراوی ئاران یاداشتێكیان پێشكەش بە داواكاری گشتی كرد، لەبەرامبەر ئەوەی ژمارەیەكی زۆر لەدەرچووی زانكۆ و پەیمانگاكان هەن و دانەمەزراون، بەڵام فەرمانبەرێكی زۆر دووكار و سێ كار دەكەن.

ئەوەشی خستەڕوو، بەپێی ئامارە بەردەستەكانیان ڕێژەیەكی زۆر لەفەرمانبەری دوو و سێ ئیش هەیە، كە ئەمە پێچەوانەی یاسای فەرمانبەرانی دەوڵەتدا، پێشتر وەزارەتی ناوخۆ هەوڵیدابوو كە ڕێگری لەمە بكات، بەڵام جێبەجێنەكرا.

باسی لەئەوەشكرد، پێویستە دەستەی نەزاهە لێپرسینەوە لەو فەرمانبەرانە بكات، كە لەپلەی خوار حەوتەوەن و دووكار وسێ كار دەكەن.
ئاماژەی بەئەوەشدا، ئەگەر داواكاری گشتی ئەم داواكارییەی لەڕێگەی حكومەتەوە جێبەجێنەكرد، ئەوا لەڕێگەی دەستەی نەزاهەوە هەوڵدەدەن، چونكە نادادپەروەرییەكی زۆر هەیە، بەجۆرێك خەڵكێك هەیە كە چەند كارێكی هەیە و هەندێكی كەسی دیكەش هیچ كارێكیان نییە.

لەهەرێمی كوردستان ڕێژەی دەرچووە دانەمەزراوەكانی زانكۆ و پەیمانگاكان هاوتای ڕێژەی فەرمانبەرانن، كە بەشێكی دانەمەزراوەكان بێكارن، و ساڵ لەدوای ساڵیش ڕێژەی دەرچووانی زانكۆ و پەیمانگاكان زیاتر دەبن.