سەردێر

سبەینێ لە سەنتەری شارەكان بەفر دەبارێت

خەڵك-بەشی هەواڵ

بەڕێوەبەرایەتی گشتی كەشناسی و بومەلەرزەزانی هەرێمی كوردستان كەشوهەوای ئەمڕۆ و سبەینێی شارەكانی هەرێمی بڵاوكردەوە.

بەپێی پێشبینییەكانی كەشناسی، ئەمڕۆ سێ شەممە ئاسمان لەنێوان هەور و باراناوی دەبێت لەگەڵ بەفر بارین لە ناوچە شاخاوییە بەرزەكان و سنوورییەكان، هەندێك كات ئاستی باران زیاتر دەبێت و خێرایی با زیاد دەكات و پلەكانی گەرما بە چەند پلەیەك ڕوو لە نزمبوونەوە دەكات.

هەر بەپێی پێشبینییەكان، سبەینێ چوار شەممە ئاسمان هەور و باراناوی دەبێت لە هەندێك ناوچە باران بارین زیاتر دەبێت و هاتنی بارستە هەوایەكی سارد لەگەڵ بارینی بەفر لەسەر ناوچە شاخاوییەكان و زیادبوونی با، هەروەها پێشبینیش دەكرێت لە سەنتەری پارێزگا و قەزا و ناحیەكان بەفر ببارێت.

كەشناسی ئاشكراشیكرد، كاریگەری ئەو شەپۆلەی ڕووی لە ناوچەكەمان كردووە بەردەوامی دەبێت بە باران بارین و بەفر بارین، سبەی چوار شەممە زیاتر كاریگەری ئەو شەپۆلە لەسەر بەشێك لە ناوچەكەمان بە تایبەتی ناوچە شاخاوییەكان و قەزاو ناحیەكانی ناوچە شاخاوییەكان و ئەگەری بەفر بارینیش لە سەنتەری پارێزگای دهۆك و سلێمانی ئەگەری بەفر بارینی دەبێت، كاریگەری ئەم شەپۆڵە لە رۆژی پێنج شەممە كۆتایی دێت.