سەردێر

سلێمانی: كافتریای “ئەستێرە” دادەخرێت

خەڵك-بەشی هەواڵ

بەهۆی هەبوونی منداڵی خوار (18) ساڵ، لیژنەكانی قائیمقامیەت كافتریا و بلیاردی ئەستێرە دادەخەن و سەرۆكی لیژنەكانیش هۆشیاری توند بە خاوەن كافتریاكان دەدات.

لەشكر حەمید، سەرۆكی لیژنە هاوبەشەكانی قائیمقامیەتی سلێمانی رایگەیاند: بەهۆی هەبوونی منداڵی خوار (18) ساڵ لە شوێنەكەیدا، كافتریا و بلیاردی ئەستێرە لەلایەن لیژنەی ریستۆرانتی قائیمقامیەتەوە دادەخرێت.

‎وتیشی: رۆژانە لیژنەی ڕێستۆرانتی سەر بە لیژنە هاوبەشەكان،‌ سەردانی گازینۆ، كافتریاكانی كێشانی نێرگەلە و شوێنی خواردن و خواردنەوە (كحولیەكان) دەكات و لەكەموكورتی شوێنەكە و پابەندنەبوونیان بە مەرج و رێنماییەكانی كاركردن دەپرسێتەوە، هەر شوێنێكیش خوارنەوە یاخود نێرگەلە پێشكەش بە منداڵی نەوجەوان بكات شوێنەكەی دادەخرێت و خاوەنەكەشی ڕوبەروی رێكاری یاسایی دەكرێتەوە‌.

رونیشیكردەوە: یاسا رێگری لە هاتوچۆكردنی منداڵی نەوجەوان و تەمەن خوار (18) ساڵ بۆ گازینۆ، كافتریای نێرگەلە و خواردنەوە كحولییەكان كردووە‌، بۆیە لەلایەن لیژنە هاوبەشەكانەوە‌ خاوەن شوێنەكان ئاگاداركراونەتەوە كە تابلۆی (هاتنە ژورەوە بۆ خوار تەمەن 18 ساڵ قەدەغەیە) لە شوێنەكانیان هەڵبواسن و هیچ جۆرێك‌ خواردن و خواردنەوە یاخود نێرگەلە پێشكەش بە منداڵی نەوجەوان نەكەن.

ئاماژەی بۆ ئەوەشكرد: بەفەرمانی قائیمقامی سلێمانی كافتریا و بلیاردی ئەستێرە دادەخرێت و خاوەنەكەشی روبەڕوی رێكاری یاسایی توند دەكرێتەوە.