سەردێر

وەزارەتی دارایی داوایەكی سلێمانی سەبارەت بە داهاتی پارێزگاكە ڕەتدەكاتەوە

“دەسەڵاتێكی مەركەزی لە هەرێم پەیڕەو دەكرێت”

خەڵك- بەشی هەواڵ
وەزارەتی دارایی هەرێم ڕەتی دەكاتەوە زانیاری بدات بە ئەنجوومەنی پارێزگای سلێمانی لەسەر داهاتی پارێزگاكە و ئیدارە سەربەخۆكانی و ئەندامێكی ئەنجوومەنی ئەنجوومەنی پارێزگای سلێمانی-ش دەڵێت: “تاكە دەسەڵات لای سەرۆكی حكومەتە و ڕوون و ڕاشكاو دەریدەخات دەسەڵات لە هەرێم مەركەزییە”.

بەپێی نووسراوێكی وەزارەتی دارایی هەرێم، كە وەك وەڵامێك ئاڕاستەی ئەنجوومەنی پارێزگای سلێمانی كراوە سەبارەت بە وەرگرتنی زانیاری لەسەر داهاتی سلێمانی و گەرمیان و ڕاپەڕین بۆ ساڵەكانی (2017 و 2018 و 2019 و 2020) ئاماژە بەوەكراوە، كە هیچ زانیارییەكی لەو شێوەیە نەدراوە بەهیچ پارێزگایەك و بۆ بابەتێكی لەو جۆرەش دەبێت ڕەزامەندی سەرۆكایەتی ئەنجوومەنی وەزیران وەربگیرێت.

لای خۆشیەوە، ڕێكەوت زەكی، ئەندامی ئەنجوومەنی پارێزگای سلێمانی لە فراكسیۆنی یەكێتی بۆ (خەڵك) ئاماژەی بەوەكرد، وەڵامی وەزیری دارایی بۆ داواكاری ئەنجوومەنی پارێزگای سلێمانی سەبارەت بەداھاتی پارێزگاكە ڕون و ڕاشكاوە، كە تاكە دەسەڵات لای سەرۆكی حكومەتە و لای وەزارەتی دارایش نییە، كەبڕیارە خەزێنەی وڵات بێت.

دەشڵێت: “ئەمە وەڵامێكی تەواوە بۆ ھەموو ئەوانەی دەڵێن حكومەتی ھەرێم مەركەزی نییە و وەزیر و دەستە و پارێزگاكان تەواوی دەسەڵاتیان ھەیە”.

جەختیشی كردەوە، دەبێت ئەم وەڵامە ھەموو داواكارانی لامەركەزی سوورتر و پێداگیرتر بكات، كە پێویستە داھاتی پارێزگاكان بەناوی پارێزگاكانەوە تۆمار بكرێت نەك وەزارەتی دارایی، لەگەڵ تەواوی دەسەڵاتە كارگێڕی و داراییەكانی تر، كە داواكراوە.

لە ماوەی ڕابردوودا بەردەوام هەندێك لە بەرپرسان و پەڕلەمانتاران ڕەخنەی ئەوەیان لە سنووری پارێزگای سلێمانی و هەڵەبجە و ئیدارەكانی گەرمیان و ڕاپەڕین گرتووە، كە داهاتی ناوخۆ نادەنەوە بە وەزارەتی دارایی و نایەتەوە خەزێنەی گشتی وڵات، بەڵام ئەو نووسراوەی وەزارەتی دارایی پێچەوانەی ئەوە دەردەخات.