سەردێر

دەنگەكانی كورد لە كەركوك پەرتەوازەیە

خەڵك-بەشی هەواڵ

بەرپرسی مەڵبەندی كەركوكی بزووتنەوەی ئیسلامی ڕایدەگەیەنێت، پێشبینی دەكرێت كورد لە كەركوك دوو لیستی بۆ هەڵبژاردنەكان هەبێت.

حەسەن شێخانی بەرپرسی مەڵبەندی كەركوكی بزووتنەوەی ئیسلامی بە (خەڵك)ی ڕاگەیاند، دوێنێ شەممە دوامۆڵەت بوو بۆ پێشكەشكردنی ناوی هاوپەیمانیەتییەك بۆ كۆمسیۆن، ئێمەش هەوڵێكی زۆرماندا بۆ كۆكردنەوەی حزبەكان بۆ ئەوەی كورد دەنگەكانی پەرتەوازە نەبێت و بە یەك لیست دابەزین.

وتیشی”هەموو هەوڵێكماندا تاكو ناوی هاوپەیمانییەتییەكە و لۆگۆكە بدەینە كۆمسیۆن، دواتر كار لەسەر ووردەكارییەكانی بكەین و تەئكید لەسەر یەكڕیزی كوردیش كرایەوە”.

ئاشكراشیكرد، كۆبوونەوەكە كۆبوونەوەیەكی سەركەوتوو بوو، ئومێدەوارین وەك كۆبوونەوەكانی پێشوو نەبێت، چونكە دەیان كۆبوونەوە دەكرا و ڕۆژێك پێش ئەوەی ناوەكان پێشكەش بكرێن لیستەكە تێكدەچوو.

ڕوونیشكردەوە، هەوڵی ئەوەماندا ئەگەر سێ چوار حزبیش بێت هاوپەیمانیەك هەبێت بەناوی لیستی كوردستانییەوە، چونكە لەوانەیە هەموو حزبەكان بەشداری نەكەن، چونكە ڕێكارە یاساییەكانی هەڵبژاردن زۆر قورس بووە، هەوڵ دەدەین ئەم لیستە كراوە بێت و هەموو حزبە كوردستانییەكان بەشداربن.
سەبارەت بە بەشداریكردنی پارتی و نەوەی نوێ، ناوبراو ڕایگەیاند، نەوەی نوێ لە هیچ كۆبوونەوەیەك بەشداری ناكات و پەیوەندیش بە پارتییەوە كراوە، وتویانە لەگەڵ لیستەكەداین، بەڵام بۆ وەردەكارییەكان لە كۆبوونەوەكانی داهاتوو گفتوگۆی لەسەر دەكەین.
جەختی لەوەش كردەوە، پێشبینی دەكرێت یەك بۆ دوو لیست هەبێت، بەڵام ئەگەر یەك هاوپەیمانی هەبێت ئەوكاتە دەنگدەرەكە زیاتر بەلای ئەوەدا دەڕوات.