سەردێر

پڕۆسەی خوێندنی ئەمساڵ لە مەترسیدایە و دواین بڕیار دەدرێت

پڕۆسەی خوێندنی ئەمساڵ لە مەترسیدایە و دواین بڕیار دەدرێت

خەڵك- بەشی هەواڵ

بریكاری وەزارەتی پەروەردەی حكومەتی هەرێم ڕایدەگەیەنێت، سبەی ئەنجومەنی وەزارەت كۆدەبێتەوە بۆ مەبەستی تاوتوێ كردنی كردنەوەی دەرگای ناوەندەكانی خوێندن، سەرۆكی لیژنەی پەروەردەش لە ئەنجوومەنی پارێزگای سلێمانی دەڵێت: “ئەگەر تا ناوەڕاستی ئەم مانگەش دەرگای ناوەندەكان بكرێتەوە، دەكرێت ئەمساڵ بەبێ كێشە تێپەڕێنرێت”.

نیاز ئەحمەد، سەرۆكی لیژنەی پەروەردە لە ئەنجوومەنی پارێزگای سلێمانی بە (خەڵك) ڕایگەیاند، بەپێی ئەو ئەزمونەی هاوكارەكانمان لە ئەنجوومەن هەیانە، كە مێژووەكەی بۆ شەڕی عیراق- ئێران دەگەڕێتەوە، ئەوكات ئەوان خوێندكاری 12ی ئامادەیی بوون، دەرگای خوێندن لە 7ی مانگی 1 كراوەتەوە و توانراوە ئەو ساڵە بەسەركەوتوویی بەڕێ بكرێت.

وتیشی، “ئەگەر تا 20ی ئەم مانگە دەرگای ناوەندەكانی خوێندن بكرێتەوە، لە لایەن لیژنەی پسپۆِری پەروەردەییەوە دەستكاری پڕۆگرامی خوێندن بكرێت و كەم بكرێتەوە بە شێوازێكی گونجاو، دەكرێت خوێندكاران پڕۆسەی ئەمساڵ بەسەركەوتوویی بەڕێ بكەن، ئەگەرنا ڕەنگە خوێندنی ئەمساڵ بكەوێتە مەترسیەوە”.

ڕاشیگەیاند، ئەمە بۆ خوێندكارانی قۆناغەكانی كۆتایی دەكرێت، بەڵام بۆ خوێندكارانی یەك و دووی بنەڕەتی كێشە دروست دەكات، چونكە ناتوانرێت لەماوەی كەمتر لە 4 مانگدا (ئەلف و بێ) فێری خوێندكاران بكرێت، كە پۆلی دووی ئەمساڵ قوتابی یەكی پار بووە و بەوشێوەی كە تێپەڕی.

ئاشكراشیكرد، “جگە لە پەتای كۆرۆنا، كە هەموو جیهانی گرتۆتەوە، قەیرانی دارایی و نەبوونی مووچە گرفتێكی دیكەی پڕۆسەی خوێندنی ئەمساڵە، ئەمەشمان زۆر بەڕوونی داوەتە وەزیری پەروەردە، كە بەڕێزیان زیاتر لەهەمووان بەپەڕۆشە بۆ ئەو پرسە”.

ئەمە لە كاتێكدایە، سەیوان عەلی، بڕیكاری وەزارەتی پەروەردەی حكومەتی هەرێم بۆ میدیاكان باسی لەوەكردووە، كە سبەی دوو شەممە ئەنجوومەنی وەزارەتیان كۆدەبێتەوە بەمەبەستی ڕێكارەكانی دەستپێكردنەوەی خوێندن.