سەردێر

وەزارەتی پەروەردە بڕیارێكی بۆ خوێندكارانی 12ی ئامادەیی دەركرد

خەڵك- بەشی هەواڵ
وەزارەتی پەروەردەی حكومەتی هەرێم بڕیارێكی بۆ خوێندكارانی 12ی ئامادەیی ئەوانەی بەشێوەی دەرەكی تاقیكردنەوە ئەنجام دەدەن دەركرد و جەختی كردەوە، تاقیكردنەوەی بەرایی لە پەروەردەی قەزاكان ئەنجام بدرێت.

بەڕێوەبەرایەتی گشتی ئەزموونەكانی وەزارەتی پەروەردەی هەرێم لە گشتاندنێكدا، كە ئاڕاستەی سەرجەم پەروەردەی پارێزگاكانی كردووە و وێنەی دەست (خەڵك) كەوتووە، ئاماژەی بەوەكردووە، دەبێت پەروەردەی قەزاكان هۆڵی تاقیكردنەوە لەناو سەنتەری قەزاكان ئامادەبكەن بەمەبەستی ئەنجامدانی تاقیكردنەوەی بەرایی بۆ خوێندكارانی دەرەكی پۆلی 12ی ئامادەیی.

ڕاشیگەیاندووە، دەبێت پەروەردەی گشتی شارەكان تاوەكو بەرواری 1-2-2021 ناوی خوێندكاران بەپێی تێمپلیتی چاپكردنی فۆڕمی سۆما ڕەوانەی بەڕێوەبەرایەتی گشتی ئەزموونەكان بكەن و دوای دەرچوونی ئەنجامی تاقیكردنەوەی بەرایی فۆڕمی ئەو خوێندكارانەی مافی بەشداری ئەزموونە گشتییەكانیان وەرگرتووە ڕەوانەی پەروەردەكانیان بكەن تاوەكو خوێندنگەكانیان داخڵی ناو سیستمی (e-parwarda)ی بكەن.