سەردێر

ماكگۆرك پۆستی نوێی وەرگرت و یەكەم پەیامی بڵاوكردەوە

خەڵك- بەشی هەواڵ
دوای پەسەندكردنی ئەنجامی هەڵبژاردنەكانی ئەمریكا لەلایەن كۆنگرێسەوە، جۆ بایدن، سەرۆكی هەڵبژێردراوی ئەمریكا بڕیاریدا برێت ماكگۆرك بهێنێتەوە گۆڕەپانی سیاسی و دۆسیەی ڕۆژهەلاتی ناوەڕاست و ئەفریقای پێ‌ سپارد، لەو بارەیەشەوە ماكگۆرك یەكەم پەیامی بڵاوكردەوە.

جۆ بایدن، سەرۆكی هەڵبژێردراوی ئەمریكا بڕیاریدا بە دیاریكردنی برێت ماكگۆرك وەك لێپرسراوی دۆسیەی ڕۆژهەڵاتی ناوەڕاست و ئەفریكا.

برێت ماكگۆرك لە پەیامێكدا لە تویتەر خۆشحاڵی خۆی ڕاگەیاندووە بەدووبارە دەستنیشانكردنی بۆ كاركردن لەئیدارەی ئەمریكا و دەڵێت: “بایدن ئەو سەركردەیەیە، كە لەم ساتە مێژووییەدا پێویستمانە”.

ڕاشیگەیاندووە، لە 10 ساڵی ڕابردوودا هەلی خزمەتكردنی لەگەڵ جۆ بایدن-ی سەرۆكی هەڵبژێردراوی ئەمریكا بۆ ڕەخساوە.

دەشڵێت: “شانازی ئەوەم پێدەبڕێت بەشداری تیمەكەی ئاسایشی نیشتیمانی ئەمریكا بكەم بە سەرۆكایەتی جاك سولیڤان لە دوای 12 ڕۆژی تر”.