سەردێر

لەسەر هێرشكردنە سەر گەشتیارانی عەرەب 16 كەس دەستگیركران

ڕێكاری یاساییان لە بەرامبەردا گیرایە بەر

خەڵك- بەشی هەواڵ

بەڕێوەبەرایەتی پۆلیسی پارێزگای هەولێر ئاشكرای دەكات، كە 16 كەس لەسەر هێرشكردنە سەر گەشتیارانی عەرەب لە فامیلی مۆڵ دەستگیركراون.

بەڕێوەبەرایەتی پۆلیسی پارێزگای هەولێر لە ڕاگەیەنراوێكدا ئاماژەی بەوەكردووە، لە شەوی ساڵی نوێ ئاژاوەیەك لە پێش (فامیلی مۆڵ) لە شاری هەولێر دروست بووە و چەند كەسێك هێرشیان كردبووە سەر گەشتیاران و سەردانیكارانی ئەو شوێنە و زیانیان بە چەند پاس و ئۆتۆمبێلێك گەیاندبوو، بۆیە لەلایەن هێزەكانی ئاسایش و پۆلیس ڕێكاری یاساییان لە بەرامبەردا گیرایە بەر.

ئاشكراشی كردووە، (16) تۆمەتبار بەو هۆیەوە دەستگیر كران و پەڕاویان بۆ ڕێكخرا و بەپێی ماددەكانی (477) و (413) لە یاسای سزادان، دەستگیر كراون.

دەشڵێت: “هەر كەسێك زیانی بەركەوتووە، دەتوانێت سەردانی بەڕێوەبەرایەتیی پۆلیسی پارێزگای هەولێر بكات تاوەكو رێكاری یاساییان بەرامبەر بگیرێتە بەر”.

پۆلیسی هەولێر دڵنیایی دەداتە هاووڵاتیان، كە “هەر كەسێك تاوان ئەنجام بدات، لە یاسا دەربازی نابێت و بە شەونخونی هێزەكانی بەڕێوەبەرایەتی پۆلیسی پارێزگای ھەولێر وھێزە ئەمنییەكانی تری شاری هەولێر، ڕووبەڕووی یاسا دەكرێتەوە”.