سەردێر

جۆرە نوێیەكەی ڤایرۆسی كۆرۆنا لە وڵاتێكی دراوسێی هەرێم تۆماركرا

خەڵك- بەشی هەواڵ

وەزیری تەندروستیی توركیا ڕایگەیاند، 15 تووشبووی كۆرۆنای گۆڕاو لە وڵاتەكەیان تۆماركراوە، كە لە بەریتانیاوە سەردانی توركیایان كردووە و جەختیشی كردەوە، گەشتكردن لە بەریتانیاوە بۆ توركیا بۆ ماوەیەكی كاتی ڕاگیراوە.

د. هێرش حەیدەر، پزیشكی پسپۆڕ لە نەخۆشخانەكانی كۆرۆنا لە سلێمانی لە هەژماری خۆی لە فەیسبوك ڕایگەیاندووە، لەڕووی زانستییەوە جیاوازی ڤایرۆسە گۆڕاوەكەی كۆرۆنا لەگەڵ ڤایرۆسی كۆرۆنا خێراییەكەیەتی، كە بەگوتەی زانایان بەڕێژەی لە ٪70 زیاترە.

دەشڵێت: “لەڕووی كاریگەری و ئاستی مەترسییەكانی سەر مرۆڤ، ئەو جۆرە گۆڕاوەی ڤایرۆسی كۆرۆنا هاوشێوەی ڤایرۆسەكەی پێشووە”.

ئاماژەی بەوەشكردووە، تاوەكو ئێستا زۆربەی تووشبووان لە وڵاتانی ئەوروپان و لەوانەش (بەریتانیا، بەلجیكا، ئیسپانیا، سوید، سویسرا، دانیمارك، فینلاندا، فەرەنسا، ئەڵمانیا، ئایسلاند، ئیتاڵیا، ئێرلاندا، ماڵتا، هۆڵەندا، پورتوگال و نەرویج).

ئاشكراشی كردووە، كە لە ئاسیا لە (چین، هیندستان، ژاپۆن، ئوردن، لوبنان، ئیسرائیل، پاكستان، سێنگاپور، كۆریای باشوور، ئیمارات، تایوان و ئوسترالیا) بڵاوبۆتەوە و لە كیشوەری ئەمریكا، لە (ویلایەتە یەكگرتووەكانی ئەمریكا، كەنەدا، بەڕازیل و چیلی) هەیە.