سەردێر

بە ڤیدیۆ؛ شێخ نەهرۆ دەربارەی مووچە بەڵێنێك بە فەرمانبەران دەدات

خەڵك- بەشی هەواڵ
شێخ نەهرۆ كەسنەزانی بەڵێنی چارەسەركردنی كێشەی مووچەی فەرمانبەران كوردستان دەدات و دەشڵێت: “هەرێم دەكەینە ناوەندێكی جیهانی”.

شێخ نەهرۆ محەمەد كەسنەزانی، ڕابەری تەریقەتی قادری كەسنەزانی لەجیهان لە كۆبوونەوەیەكی فراواندا، كە بە بۆنەی هاتنی سەری ساڵی نوێوە ڕێكی خستووە دەڵێت: “مەرجەعی كەسنەزانی كێشەی كوردی گرتۆتە ئەستۆی خۆی و مژدەی خۆشی پێیە بۆ خەڵكی هەرێمی كوردستان”.

ڕاشیگەیاند، چیدی دەسەڵاتی سیاسی ناتوانێت كێشەكان چارەسەربكات و مەرجەعی كەسنەزانی بە سەركردایەتی خودی خۆی چارەسەركردنی كێشەكانی هەرێمی كوردستانی گرتۆتە ئەستۆی خۆی و پڕۆژەی گەورەیان بەدەستەوەیە بۆ هەرێم .

شێخ نەهرۆ ئاشكراشی كردووە، كە سلێمانی دەكاتە پایتەختی تەسەوف لە جیهاندا و دەبێتە ناوەندێكی جیهانی و ئەم هەنگاوەش سودێكی زۆری دەبێت بۆ خەڵكی هەرێمی كوردستان.