سەردێر

یەكەم كاردانەوەی ئێران بەرانبەر بە دەنگۆی بەرپابوونی جەنگ

خەڵك- بەشی هەواڵ

لە یەكەم كاردانەوەی كۆماری ئیسلامی ئێران بەرانبەر بە دەنگۆی بەرپابوونی جەنگ، وەزیری دەرەوەی وڵاتەكە ڕایدەگەیەنێت، ئەوان هەوڵ بۆ جەنگ نادەن، بەڵام بەشێوەیەكی فراوان و ڕاستەوخۆ بەرگری لە ئاسایش و گەل و بەرژەوەندییەكانیان دەكەن.

ئەمڕۆ پێنج شەممە، محەمەد جەواد زەریف وەزیری دەرەوەی ئێران لە تویتێكی لەسەر تۆڕی كۆمەڵایەتی (تویتەر) ڕایگەیاند”ئێران هەوڵ بۆ جەنگ نادات، بەڵام بەشێوەیەكی فراوان و ڕاستەوخۆ بەرگری لە ئاسایش و گەل و بەرژەوەندییەكانی وڵاتەكەی دەكات”.

بە وتەی زەریف وەك لە تویتەكەیدا هاتووە”زانیارییە هەواڵگرییەكان لە عیراقەوە، ئاماژە بە بوونی پیلانێك دەكەن بۆ بیانووهێنانەوە بۆ بەرپاكردنی جەنگ”.

لەم چەند ڕۆژەی دواییدا، دەنگۆیەكی زۆر بڵاوبۆوە سەبارەت بە جموجۆڵە سەربازییەكانی ویلایەتە یەكگرتووەكان لە كەنداو و عیراق كە بە بۆچوونی هەندێك لە چاودێران، دەستەواژەن بۆ بەریەككەوتنی سەربازی نێوان واشنتن و تاران.