سەردێر

ئەوروپا هۆشداری دەداتە ئێران

خەڵك-

فەڕەنسا و ئەڵمانیا و بەریتانیا هۆشدارییان دایە ئێران لە زیادكردنی رێژەی پیتاندنی یۆرانیۆم لە 20%وە بۆ 60% و ئەو هەنگاوەیان بە مەترسیدار زانیوە و پێچەوانەی گفتوگۆكانی ڤیەننایە بۆ چارەسەركردنی كێشەكانی رێككەوتنی ناوەكی ئێران.

وەزارەتەكانی دەرەوەی فەڕەنسا و ئەڵمانیا و بەریتانیا كە واژۆیان لەسەر رێككەوتنی ناوەكی 2015 كردووە لەگەڵ ئێران دەڵێن ئەم هەنگاوەی ئێران پەرەسەندنێكی مەترسیدارە، چونكە بەرهەمهێنانی یۆرانیۆم بە ئەو ئاستە بەرزە هەنگاوێكی گرنگە بۆ دروستكردنی چەكی ناوەكی.

ئێران لە دوای هێرشەكەی سەر دامەزراوەی ناوەكی نەتەنز بەرزكردنەوەی ئاستی پیتاندنی یۆرانیۆمی راگەیاند.

حەسەن رۆحانی سەرۆكی ئێران رۆژی چوار شەممە رایگەیاند بەرزكردنەوەی ئاستی پیتاندنی یۆرانیۆم وەڵامێك بوو بۆ هێرشكردنەسەر دامەزراوەی ناوەكی نەتەنز بۆ كردەوەیەكی تیرۆرستی ئیسرائیل.

راشیگەیاند بە دڵنیاییەوە چالاكی ناوەكی ئێران ئاشتییانەیە و لە ژێرچاودێری رێكخراوی وزەی جیهانیدایە جا رێژەكەی 20% یان 60% بێت.

رۆژی سێشەممە سەرۆكی ئەمریكا جۆ بایدن رایگەیاند تا ئێستا ئەمریكا ئامادەیە بۆ بەردەوامیدان بە گفتووگۆ لەگەڵ ئێران، سەرباری بەرزكردنەوەی ئاستی بەرهەمی یۆرانیۆم.