سەردێر

ساڵح مووسلیم و ئاسیا عەبدوڵڵا بە هاوسەرۆكانی پەیەدە هەڵبژێردران

پەیەدە خۆی نوێكردەوە

خەڵك-

لە دووهەمین رۆژی كۆنگرەی پارتی یەكێتی دیموكرات پەیەدە لەشاری حەسەكەی رۆژئاوای كوردستان، ساڵح مووسلیم و ئاسیا عەبدوڵڵا بە هاوسەرۆكانی ئەو پارتە فەرمانڕەوایەی رۆژئاوای كوردستان هەڵبژێردران.

لە نۆهەمین كۆنگرەی پەیەدەدا 700 ئەندام و میوان بەشدارن و چاوەڕێ دەكرێت 145 ئەندامی دەستەی رێبەرایەتیش هەڵببژێردرێن.

ساڵح مووسلیم و ئاسیا عەبدوڵڵا، جێگای ئەنوەر مووسلیم و عائیشە حەسۆ هاوسەرۆكانی پێشوو دەگرنەوە.

پارتی یەكێتی دیموكرات پەیەدە ساڵی 2003 دامەزراوە و پێڕەو لە بیر و فكری عەبدوڵڵا ئۆجەلان و سیاسەتی گشتی پەكەكە دەكات، هێندێك لایەن بە باڵی پەكەكەی لە رۆژئاوای كوردستان هەژمار دەكەن.

ئاسیا عەبدوڵڵا؟
ئاسیا عەبدوڵڵا یەكێك لە كادرە ناسراوەكانی پەیەدە و سیاسییەكی كارای رۆژئاوای كوردستانە.

ئاسیا عەبدوڵڵا لە ساڵی 1971 لە گوندی تەبكەی سەر بە ناوچەی دێركی سنووری قامیشلۆی رۆژئاوای كوردستان لە دایكبووە و ساڵی 1990 تێكەڵی كاری سیاسی بووە.

لە كۆنگرەی پێنجهەمینی پەیەدە لە ساڵی 2012دا بە هەمان شێوەی ئێستا پۆستی هاوسەرۆكی پەیەدەی پێدراوە كە بۆ یەكەمجار لەم كۆنگرەیەدا پەیەدە سیستمی هاوسەرۆكی پێڕەوكرد و دوایی لە كۆنگرەی شەش لە 2015 هەمان پۆستی وەرگرتەوە و لە هەمان ساڵدا لەگەڵ فرانسوا ئۆلاند سەرۆكی پێشووی فەڕەنسا لە كۆشكی ئیلێزێ دیداری بووە.

لە 2017 ئاسیا عەبدوڵڵا وەك هاوسەرۆكی دەستەی بەڕێوەبەری تەڤدەم هەڵبژێردراوە.

ساڵح موسلیم؟
ساڵح مووسلیم یەكێك لە سیاسییە بەنێوبانگ و كاریگەرەكانی رۆژئاوای كوردستان و ناوچەكەیە، ساڵی 1951 لە گوندی شێرانی سەر بە كۆبانێ لەدایكبووە و ساڵی 1970 تێكەڵاوی كاری سیاسیی بووە.

مووسلیم ئەندازیارە و ساڵی 1977 لە بەشی تەكنیكی زانكۆی ئیستەنبوڵ بڕوانامەی بەدەستهێناوە.

لە سەرەتای دروستبوونی پەیەدەوە مووسلیم چەندین ئەركی وەئەستۆ گرتووە و 2010 بووە سەرۆكی حیزب پێش سیستمی هاوسەرۆكی و دوایی لە 2012 بووە هاوسەرۆكی حیزب و 2015 دووبارە هەڵبژێردراوەتەوە.

لە 2013 و 2014 و 2015 ئەركی گفتووگۆی فەرمانڕەوای نوێی رۆژئاوای كوردستان و توركیای لە ئەستۆگرتووە.

ساڵی 2018 لە چیك بەپێی پلانێكی توركیا هەوڵی دەستگیركردنی موسلیم درا، بەڵام ناوبراو هیچ تۆمەتێكی بەسەردا ساغ نەبووەوە.





هەلبژاردە

گرنگترینەکان