سەردێر

ساڵوەگەڕی دەستگیركردنی ئۆجەلانە

خەڵك-

ئەمڕۆ 15ی شوباتی 2021، 22 هەمین ساڵوەگەڕی دەستگیركردنی عەبدوڵڵا ئۆجەلان رێبەری پەكەكەیە.

عەبدوڵڵا ئۆجەلان رێبەری پارتی كرێكارانی كوردستان پەكەكە، لە 4ی نیسانی 1948 لە گوندی ئامەرا لە پارێزگای رەحای باكوری كوردستان لە رۆژهەڵاتی توركیا لە دایك بووە و براگەورەی 7 خووشك و برايە.

عوسمان ئۆجەلان برای عەبدوڵڵا ئۆجەلانە، پێشتر یەكێك لە فەرمانداران و بەرپرسانی باڵای پەكەكە بووە و ئێستا لە هەولێر لە باشوری كوردستان دانیشتووە پەیوەندی بە پەكەكەوە نەماوە.

محەمەد ئۆجەلان برایەكی دیكەی ئۆجەلانە ئەویش لە باكوری كوردستان دەژی و ئەندامی پارتی ناوچەكانی دیموكرات بووەو چەند جارێك سەردانی ئۆجەلانی برای لە زیندانی ئیمراڵی كردووە.

هاوكات عومەر ئۆجەلان و دیلەك ئۆجەلان خزمی عەبدوڵڵا ئۆجەلانن و ئەندامی پەرلەمانی توركیا بوون.

ئۆجەلان دواناوەندی لە ئەنقەرە خوێندووە، دواتر لە بەشی خانوبەرەی ئامەد كاری كردووە، لەبەشی یاسای زانكۆی ئیستەنبوڵ خوێندویەتی و دواتر گواستراوەتەوە بۆ بەشی زانستە سیاسییەكان بۆ زانكۆی ئەنقەرە.

سەرەتا ئۆجەلان ئەندامی كۆمەڵەی گەنجانی شۆڕشگێڕبووە، لە ساڵی 1972 دەستگیركرا بەهۆی بەشداری لە خۆپیشاندانی ناڕەزایەتی دژی كوژرانی كەسایەتیەك بە ناوی ماهیر چایان بۆ ماوەی 7 مانگ زیندانی كرا.

لە ساڵی 1973 یەكێتی دیموكراتی ئەنقەرە دامەزرا و ئۆجەلان پاش ماوەیەك بووە سەرۆكی دەستەی رێكخراوەكە و لە 1974 كۆمەڵكە داخرا.

 

لە 1978 ئۆجەلان پارتی كرێكارانی كوردستان پەكەكەی دامەزراند، بۆیە ئۆجەلان لە 1979 چووە سوریا تا 1998 كاتێك سوریا رێگەی مانەوەی زیاتری پێنە دا.

لە ساڵی 1984 پەكەكە دەستی بە تێكۆشانی چەكداری كرد دژی دەوڵەتی توركیا، بەهۆیەوە ئەمریكاو یەكێتی ئەوروپا، سوریا، ئوسترالیا و توركیا ئەم رێكخراوەیان خستە لیستی تیرۆرەوە.

لە ژێر هەڕەشەكانی توركیادا حكومەتی سوریا ئۆجەلانی ناچاركرد ئەو وڵاتە جێبهێڵێت، بۆیە رووی كردە روسیا و دواتر ئیتالیا و یۆنان.

ئۆجەلان لە 15ی شوباتی 1999 لە ئۆپەراسیۆنێكی هاوبەشی دەزگای هەواڵگری ئەمریكایی سی ئای ئەی، ئیسرائیلی مۆساد، توركی میت لە نایرۆبی پایتەختی كینیا دەستگیركرا.

دوای دادگاییكردنی، ئۆجەلان بڕیاری زیندانیكردنی هەمیشەیی بۆ دەرچوو، لەو كاتەوە ماوەی 22 ساڵە لە زیندانی ئیمراڵی لە دەریای مەڕمەڕە زیندانیكراوە.

ئۆجەلان تەنها رێگای پێ دەدرێت كتێب بخوێنێتەوە لەگەڵ یەك رۆژنامە و یەك گۆڤار و دەشتوانێت گوێ لە رادیۆ بگرێت.

ئۆجەلان چەند جارێك لە زینداندا چاوی بە پارێزەرەكانی، كەسوكارەكەی كەوتووە و پەیوەندیشی پێوەكردوون، بەشێوەی سنورداریش دەتوانێت ژمارەیەك لە زیندانی دیكە لە گرتووخانەكەدان ببینێت و ژمارەیەك پەیامیشی بڵاوكردووەتەوە.