“قەدەغەی هاتووچۆ و خوێندنی ئۆنلاین دەستپێدەكاتەوە”

ئاماری كۆرۆنا لە عیراق و هەرێم لە هەڵكشانە

سەردێر

خەڵك-
بەهۆی هەڵكشانی ژمارەی تووشبوون بە ڤایرۆسی كۆرۆنا لە عیراق هۆشداری دەستپێكردنەوەی قەدەغەی هاتووچۆ و داخستنی دەرگای ناوەندەكانی خوێندن دەدرێت و بریكاری وەزیری تەندروستی هەرێم-یش دەڵێت: “لەگەڵ كردنەوەی دەرگای خوێندنگەكان لە هەرێم تا ئێستا 4 خوێندكار تووشی كۆرۆنا بوون”.

ئاماری كۆرۆنا لە عیراق و هەرێم لە هەڵكشانە
بەپێی ڕاگەیەنراوێكی وەزارەتی تەندروستی عیراق، دوێنێ‌ هەینی 2 هەزار و 530 كەس تووشی كۆرۆنا بوون، لە كاتێكدا لە هەفتەی ڕابردوودا ئامارەكە بۆ خوار 600 كەس دابەزیبوو، هاوكات هەر دوێنێ‌ هەزار و 8 كەس چاكبوونەتەوە و 13 كەسیش گیانیان لەدەستداوە.

لای خۆشیەوە، وەزارەتی تەندروستی هەرێم لە ئاماری ڕۆژانەی خۆیدا ئاماژەی بە تووشبوونی 98 كەس و چاكبوونەوەی 99 كەس و گیانلەدەستدانی 3 كەس بە ڤایرۆسی كۆرۆنا كردبوو لە ڕۆژی هەینیدا و ئەوەش بە بەرزبوونەوەی ژمهارەی تووشبووان دادەنرێت بە بەراورد بە ڕۆژانی ڕابردوو.

عیراق هەنگاو بۆ كەمكردنەوەی دەوام و خوێندنی ئۆنلاین دەنێت

بەهۆی هەڵكشانی ژمارەی تووشبووان بە ڤایرۆسی كۆرۆنا، حكومەتی عیراق دووبارە هەنگاو بەرەو خوێندنی ئۆنلاین و داخستنی دەرگای خوێندنگاكان و كەمكردنەوەی دەوام دەنێت و بڕیارە لیژنەی باڵای تەندروستی و سەلامەتی نیشتمانی كۆببێتەوە و دوای هەڵسەنگاندنی دۆخەكە دوایین بڕیار بدات.

حەسەن تەمیمی، وەزیری تەندروستی عێراق لە بەیاننامەیەكدا ڕایگەیاندووە، لەگەڵ وەزارەتی پەروەردە و وەزارەتی خوێندنی باڵا هەوڵ بۆ ڕاگرتنی خوێندن لەناو كەمپەس و دووبارە دەستپێكردنەوەی خوێندنی ئۆنڵاین دەدەن.

تەمیمی داواشی لە لیژنەی باڵای ڕووبەڕووبوونەوەی كۆرۆنا كرد، بەهۆی بەرزبوونەوەی ڕێژەی تووشبوون بە كۆرۆنا هەموو كۆبووونەوە و دانانی پرسە قەدەغە بكات و هۆڵی ئاهەنگ و بۆنەكان دابخات.

وەزیری تەندروستی عێراق ڕاشیگەیاند، لەگەڵ وەزارەتی پەروەردە و خوێندنی باڵا لە گفتوگۆدان بۆ ئەوەی خوێندن بكرێتە ئەلەكترۆنی و خوێندنی ناو پۆل ڕابگیرێت.

لای خۆشیەوە، شانەی قەیرانی پەڕلەمانی عێراق لە بەیاننامەیەكدا ئاماژەی بەوەكردووە، بەهۆی هەڵكشانی ئامارەكانی توشبوون بە كۆرۆنا، سبەی تاوتوێی ئەوە دەكەن دەوام بەرێژەی 50% كەم بكەنەوە و بۆ ماوەی دوو هەفتەش خوێندن بكەن بە ئۆنلاین.

لە هەرێم كۆرۆنا لەناو خوێندكاران تۆماركرا
لە خوێندنگەی هەمدلای بنەڕەتی تێكەڵاو لە شارۆچكەی مێرگەسۆر بەهۆی تووشبوونی ژمارەیەك خوێندكار دەرگای ئەو خوێندنگەیە داخرا و بریكاری وەزارەتی تەندروستی هەرێم-یش دەڵێت: “پێویستە خوێندكاران پابەندی ڕێكارەكانی خۆپارێزی بن”.

خوێندنگەی هەمدلای بنەڕەتی تێكەڵاو لە ئاگادارییەكدا ئاماژەی بەوەكردووە، لەبەر نەخۆشی كۆرۆنا و تووشبوونی بەشێكی خوێندكاران بەنەخۆشییەكە، دەرگای خوێندنگەكە دادەخەن و ئەم هەفتەیە داەوام ناكرێت و بۆ هەفتەی داهاتووش ئاگادارتان دەكەینەوە.

هاوكات، بەشێكی میدیاكان دەنگۆی تووشبوونی چەند خوێندكارێكیان لە خوێندنگەیەكی سلێمانی بڵاوكردەوە، بەڵام بەڕێوەبەرێتی پەروەردەی ڕۆژئاوای سلێمانی لە ڕاگەیەنراوێكدا ڕەتی كردەوە و ئاماژەی بەوەكردووە، كە خوێندكاران سەلامەتن و هیچ خوێندنگەیەك بەهۆی كۆرۆناوە دانەخراوە.

لای خۆشیەوە، د. ڕەهێڵ فەرەیدون، بریكاری وەزارەتی تەندروستی هەرێم ڕایگەیاندووە، بەپێی پێویست ڕێنماییە تەندروستییەكان لە خوێندنگەكان پەیڕەو ناكرێت و تا ئێستا 4 حاڵەتی تووشبوون بە كۆرۆنا تۆماركراون.

ئایا خوێندن لە هەرێم ڕادەگیرێتەوە؟
بەپێی زانیارییەكانی (خەڵك) تا ئێستا هیچ بڕیارێك نییە بۆ ڕاگرتنی پڕۆسەی خوێندن لە هەرێمی كوردستان و بڕیاریش لە دوای 20ی ئەم مانگەوە لیژنەی بالای ڕووبەڕووبوونەوەی كۆرۆنا لە هەرێم كۆببێتەوە و دوایین هەڵسەنگاندن بۆ ڕەوشی تەندروستی بكات و بڕیاری كۆتایی بدات بە بەردەوام بوون لەسەر شێوازی خوێندن بەم جۆرە یان زیادكردنی ڕۆژەكانی دەوامی خوێندكاران.