سەردێر

رۆڵی ژنانی مۆساد لە رێككەوتنی ئەبراهام

ژنانی مۆساد قورسترین ئەرك جێبەجێدەكەن

خەڵك-

كەناڵی 12ی ئیسرائیلی لە راپۆرتێكدا باس لە رۆڵی ژنانی دەزگای هەواڵگری مۆساد دەكات لە سازكردنی رێككەوتنی ئەبراهام و ئاشتبوونەوە لەگەڵ وڵاتانی كەنداو و عەرەبی.

بەپێی راپۆرتی كەناڵەكە، سەرۆكی دەزگای هەواڵگری ئیسرائیلی مۆساد لە مانگی كانوونی یەكەمی رابردوودا رێزی ناوە لە ئەندامە ژنەكانی دەزگای مۆساد بەهۆی رۆڵی گەورەیان لە ئاساییكردنەوەی پەیوەندییەكان لەگەڵ وڵاتانی كەنداو كە رێككەوتنی ئەبراهامی لێ بەرهەم هات.

بەپێی زانیاریی و لێكۆڵینەوەكان، ژنانی دەزگای هەواڵگری مۆساد رۆڵی كاراو گرنگیان هەبووە لە پەیوەندییەكانی دەزگای مۆساد لەگەڵ وڵاتانی كەنداو.

بەپێی لێكۆڵینەوەكان یوسی كۆهین سەرۆكی دەزگای هەواڵگری مۆساد لە مانگی كانوونی یەكەمی ساڵی رابردوودا هەستاوە بە بەخشینی بڕوانامە بە 8 ژن لە بەرامبەر رۆڵیان لە پەیوەندییەكان لەگەڵ وڵاتانی كەنداو كە لە كۆتاییدا رێككەوتنی ئەبراهامی لێ بەرهەمهات.

ئاماژە بە یەكێك لە ژنەكان كراوە بە ناوی یائیل كە بەشداری لە ئۆپەراسیۆنی بەهاری گەنجان كردووە لە نێوەڕاستی بەیروت.

دوو لە كارمەندەكانی هەواڵگری لە بەیروتی پایەختی لوبنان نیشتەجێبوون لەوێ زانیارییان لەسەر بەرپرسی رێكخراوی رزگاریخوازی فەڵەستینی كۆكردووەتەوە كە كراوەتە ئامانجی ئۆپەراسیۆنەكانی كوشتن لە میانەی چاودێری لە یەكەیەكی نیشتەجێبوونەوە لە بەرامبەر ماڵەكەی كە بەكرێ گرتبوویان.

ژنانی مۆساد لە سەرانسەری جیهاندا بەچەندین ناوەوە كار دەكەن، لە هەر رۆڵێك كە بۆیان بكرێت، قورسترین ئەرك جێبەجێیان كرد لە جەنگی ئۆكتۆبەری 1973دا بوو، ئەویش بە رۆیشتن بۆ بەرەی سوپای میسری بۆ تۆماركردنی ژمارەی كەشتی و زرێپۆشەكان و گەیاندنی ئەم زانیارییانە بە بارەگای مۆساد لە ئیسرائیل.

ساڵی رابردوو ئیسرائیل رێككەوتنی ئاشتبوونەوەی بە چاودێری ئەمریكا كرد لەگەڵ ئیمارات، بەحرێن، سودان و مەغریب.