كۆبانێ‌، بە چاندنی نەمام پەیامێكی بەجیهان دا

سەردێر

خەڵك-
ماوەی 6 ساڵ تێدەپەڕێت بەسەر ئازادكردنی شاری كۆبانێ‌ لەدەست ڕێكخراوی تیرۆرستی داعش و 7 ساڵ بەسەر ڕاگەیاندنی خۆسەری كانتۆنی كۆبانێ‌، ئەمڕۆش بەو بۆنەیەوە بە دەستپێشخەری یەكێتی پارێزەران، حزب و لایەنە سیاسییەكانی شارەكە هەڵمەتی چاندنی هەزار نەمامیان ئەنجامدا و تێیدا جەخت لە یەكڕیزی گەلی كورد كرایەوە.

ئەمڕۆ بوو كۆبانێ‌ ئازادكرا
لە 27-1-2014 ئیدارەی شاری كۆبانێ‌ بڕیاری ڕاگەیاندنی خۆسەری و پەسەندكردنی سیستمی كانتۆن-ی دەركرد و جەختی لە پەیڕەوكردنی سیستمی فیدڕاڵی بۆ تەواوی سوریا كردەوە و هاوكات لە 26-1-2015 تەواوی شارەكە دوای بەرخودانێكی چەند مانگی لەدەست چەكدارانی ڕێكخراوی تیرۆرستی داعش ڕزگار كرا.

لە شەڕی تاقەتپڕوكێنی ڕزگاركردنی كۆبانێ لەلایەن شەڕڤانانی یەكینەكانی پاراستنی گەل (یەپەگە) و یەكینەكانی پاراستنی ژنان (یەپەژە) هێزێكی زۆری پێشمەرگەی كوردستان بە بڕیاری پەڕلەمانی كوردستان و حكومەتی هەرێم و بە پشتیوانی گەورەی هێزی نێودەوڵەتی بە سەرۆكایەتی ئەمریكا بەشدارییان كرد و توانیان نەهێڵن كۆبانێ‌ بكەوێت و بەتەواوی ڕزگاركرا.

ئەمڕۆ ساڵڕۆژی ڕۆیشتنی پێشمەرگەیە بۆ كۆبانێ

كۆبانێ‌ یەكەم وێستگەی شكتپێهێنانی داعش بوو
ئیدارەی خۆسەری ڕۆژئاوای كوردستان بەبۆنەی تێپەڕبوونی 6 ساڵ بەسەر یادی ڕزگاركردنی كۆبانێ‌ بەیاننامەیەكی بڵاوكردەوە و ڕایگەیاندووە، ئەو بەرخودانەی لە ڕۆژئاوای كوردستان سەریهەڵدا لەكاتێكدابوو، كە داعش دەستی گرتبوو بەسەر بەشێكی زۆری خاكی سوریا، بەڵام بە ڕزگاركردنی كۆبانێ‌ لە 26ی كانوونی دووەمی ساڵی 2015 بووە سەرەتای شكستپێهێنانی ئەو ڕێكخراوە تیرۆرستیە و دەستپێكی سەركەوتنە یەك لەدوای یەكەكان.

ئاماژەی بەوەشكردووە، كۆبانێ‌ پڕۆژەی خۆبەڕێوەبەری هەڵبژارد وەك پراكتیزەكردنێكی دیموكراتی لە 27ی كانوونی دووەمی ساڵی 2014 و ئەوەش بووە هۆی پتەوكردنی پڕۆژەی دیموكراتی لە تەواوی سوریا.

ڕاشیگەیاندووە، هەردوو یادی هەڵبژاردنی خۆسەری و ڕزگاركردنی شارەكە لەكاتێكدا دەكەینەوە، كە 6 ساڵ تێدەپەڕێت بەسەر ئازادی و 7 ساڵیش بەسەر پڕۆسەی بەدیموكراتی بوون، كە ئەوانەش لە ئەنجامی بەرخودان و گیانبەخشینی ڕۆڵەكانی گەلەكەمان بووە و ئەوەش بووە ڕێڕەوی ڕاستەقینەی دیموكراتی و دامەزراندنی ئیدارەی دیموكراتی ئازادی گەلەكەمان.

ئیدارەی خۆسەری دەشڵێت: “پێویستە ئەو ناوچانەی لەلایەن توركیاوە لە عەفرین و سەرێكانی و گرێ سپی داگیركراون بەزووترین كات ئازادبكرێنەوە هاوكات لەگەڵ یادی ڕزگاركردنی كۆبانێ‌، كە تێیدا سەرەتای هەرەسهێنانی تیرۆر بوو”.

DIYAKO בטוויטר: "امروز اولین سالگرد شهادت رفیق موسی هَردم تک تیرانداز افسانه ای نبرد تاریخی #کوبانی است.او 24 ساله و اهل ارومیه بود https://t.co/ZclqB1d8FX"

بە چاندنی 1000 نەمام پەیامی یەكڕیزی كورد ڕاگەیەنرا
لای خۆشیەوە، پارێزەر جەلال شێخۆ، ئەندامی دەستەی دەستپێشخەری پارێزەرانی كۆبانێ‌ بۆ یەكڕیزی بەرەی كوردی و ئەندامی یەكێتی پارێزەران ڕایگەیاندووە، ئەم دەستپێشخەرییەیان كردووە لە ڕۆژی ئازادكردنی كۆبانێ‌ و تێیدا بانگەواز دەكەن بۆ سەرجەم هێز و لایەنە سیاسییەكانی شارەكە و دامەزراوەكانی كۆمەڵگەی مەدەنی و كەسایەتییە سەربەخۆكان تاوەكو هەڵوێستەكانیان یەكبخەن.

ڕاشیگەیاندووە، هەڵمەتی چاندنی 1000 نەمام نامەیەكە بۆ لایەنە سیاسییەكان، تاوەكو هەموویان یەكبن و بەشداری بكەن لە یەك كاری هاوبەشدا لە ڕۆژێكی پیرۆزدا و ئامانجیشیان ئەوەیە بە هەموو جیهان بڵێن، كە خەڵكی كۆبانێ‌ پەیوەستن بە نیشتمان و خاكی خۆیانەوە.

جەختیشی كردۆتەوە، دار ڕەمزی ئاشتی و ژیانەوەی زەوییە، بۆیە ئێستا كاتی ئاشتی و ئارامییە و كاتی كۆتایی هاتنی جەنگ و دەمارگیرییە لە باكوور و ڕۆژهەڵاتی سوریا و تەواوی ڕۆژهەڵاتی ناوەڕاست.

سەرۆكی هەرێم پەیامێك بۆ كۆبانێ‌ دەنێرێت
نێچیرڤان بارزانی، سەرۆكی هەرێمی كوردستان لە پەیامێكدا لەساڵیادی ڕزگاركردنی شارەكە ئاماژەی بەوەكردووە، یادی داستانی ئازادكردنی كۆبانێ لە تەواوی گەلی كوردستان و هەموو ئازادیخوازانی جیهان پیرۆز دەكەم.

ڕاشیگەیاندووە، لەم یادەدا سەرمان لەبەردەم گیانی پاكی شەهیدان دادەنوێنین، بە ڕێز و وەفادارییەوە یادیان دەكەینەوە.

دەشڵێت: “سوپاسی هێزەكانی هاوپەیمانان دەكەین، كە لە شەڕی دژی تیرۆردا، هاوكارمان بوون”.

 

وێنەكان، شەفەق نیوز