سەردێر

وێنەی ئۆجەلان هەرای نایەوە

شەوی رابردوو پۆلیسی توركیا ئۆپەراسیۆنی گەڕان و پشكنینی لە بارەگایەكی پارتی دیموكراتی گەلان هەپەدە لە ناوچەی ئەسنیۆرتی ئیستەنبوڵ ئەنجام دا.

ئەو ئۆپەراسیۆنە لە دوای ئاشكرابوونی هەڵواسینی وێنەی عەبدوڵڵا ئۆجەلان رێبەری دەستگیركراوی پارتی كرێكارانی كوردستان پەكەكە و ئاڵاكانی بوو، لە كاتی پاككردنەوەی بارەگاكە لە ڤایرۆسی كۆرۆنا.

سولەیمان سۆیلۆ وەزیری ناوخۆی توركیا ئەمڕۆ یەك شەممە تۆمارێكی ڤیدیۆیی بڵاوكردەوە كە لەنێو بارەگای هەدەپەدا گیراوە.

سۆیلۆ رەخنەی لە سیاسەتی خۆرئاواش گرت بەرامبەر توركیا و پەكەكە، وتی “هیچ وڵاتێكی دیموكراتی نییە لە جیهاندا رێبدات بە ئەو جۆرە كارانە، بە بوونی رێكخراوی تیرۆرستی لەسەر خاكەكەی”.

بەپێی تۆمارە ڤیدیۆییەكە، وێنەی عەبدوڵڵا ئۆجەلان لەنێو بارەگای هەدەپەدا لە پاڵ وێنەی چەند شەڕڤان و گەریلایەك و دروشمەكانی پەكەكە دژی توركیا هەڵواسراون بە بەپێی میدیاكانی توركیا، دژی ئاسایشی نەتەوەیی ئەو وڵاتەدا بوون.

وەزیری ناوخۆ دەڵێت: سەدان خێزان نزیكەی ساڵ و نیوێكە لە پێش بارەگای سەرەكی هەدەپە لە پارێزگای دیار بەكر داوای گەڕاندنەوەی گەنجە رفێنراوەكانیان دەكەن لەلایەن پەكەكەوە.

عەبدوڵڵا ئۆجەلان رێبەری پەكەكە لە شوباتی 1999 لە نایرۆبی لەلایەن هێزێكی نێودەوڵەتییەوە دەستگیركرا و رادەستی توركیا كرا.

دادگای توركیا سەرەتا سزای لە سێدارەدان و دواتر سزای زیندانی هەمیشەیی بۆ دەركرد و تا ئێستا چەند جارێكی كەم رێگا بە بینیی ئۆجەلان دراوە لەلایەن كەسوكاری و پارێزەرەكانیەوە و بە سەدان جاریش داواكاری بینینی رەتكراوەتەوە.

دەسەڵاتدارانی ئەنقەرە رێگا بە بینینی ئۆجەلان دەدەن لە كاتی پرۆسەی ئاشتیدا، یان ئاڵۆزبوونی قەیرانی كوردەكان لەو وڵاتەدا بەپێچەوانەوە لە كاتی دیكەدا رێگای بینینی نادەن.

هەدەپە حزبێكی سیاسی مۆڵەت پێدراوی فەڕمی توركیایە جگە لە كوردەكان، زۆرێك لە چەپەكان لە ریزەكانیدان و فراكسیۆنی خۆی هەیە لە پەرلەمان و یەكێكە لە پارتە ئۆپۆزسیۆنە بەهێزەكان.

هەدەپە ئێستا لەگەڵ پارتی جەهەپەی ئۆپۆزسیۆن نزیكایەتی و جۆرێك لە هاوپەیمانێتییان دژی ئاكپارتی و مەهەپەی دەسەڵاتدار پێكهێناوە كە توانیان لە دواین هەڵبژاردنی شارەوانییەكاندا سەرۆكی شارەوانی ئیستەنبوڵ لە حزبی دەسەڵات ببەنەوە.

بە رای شرۆڤەكارانی سیاسی چاوەڕێدەكرێت بۆ هەڵبژاردنەكانی داهاتوو هەدەپە و جەهەپە كاری پێكەوەیی زیاتر تا بەستنی هاوپەیمانی تەواو بكەن، بەتایبەت كە دەگوترێت لە هەڵبژاردنەكانی ئایندەدا خۆرئاوا كاردەكات بۆ سەرخستنی ئۆپۆزسیۆن و شكستپێهێنانی ئاكپارتی.

هەپەدە لەلایەن ئەنقەرەوە تۆمەتبار دەكرێت بە پەیوەست بوونی بە پەكەكەوە، بەهۆیەوە دەیان ئەندام پەرلەمان و سەرۆك شارەوانییەكانی هەدەپە لە زۆرینەی شارەكانی باكوری كوردستان دەستگیركراون و زیندانیكراون، یان لایەنی كەم لێپرسینەوەیان لەگەڵ كراوە یان لە پۆستەكانیان دوورخراونەتەوە.

هەدەپە لە ساڵی 2012 دوای هەڵوەشاندنەوەی چەندین پارتی كوردی لە توركیا دامەزراندنی خۆی بە فەڕمی راگەیاندووە.

خەڵك- بەشی هەواڵ



هەلبژاردە

گرنگترینەکان