سەردێر

مووچەی 7 مانگی فەرمانبەرانی هەرێم پاشەكەوت كرا

خەڵك- بەشی هەواڵ
وەزارەتی دارایی عیراق دەستی بە دابەشكردنی مووچەی مانگی 1ی فەرمانبەران كرد بەبێ‌ لێبڕین و وەزارەتی دارایی هەرێم-یش مووچەی دوو مانگی كۆتایی ساڵی ڕابردوو پاشكەوت دەكات و بۆ ڕێكخستنەوەی لیستی مووچە لەگەڵ عیراق مووچەی مانگی یەك بە لێبڕینەوە دابەش دەكات.

لە عیراق و هەرێم دابەشكردنی مووچە دەستپێدەكات
بەپێی نووسراوێكی وەزارەتی دارایی عیراق، لە دوای 20ی مانگەوە، واتە لە سبەینێوە دەست بە دابەشكردنی مووچەی مانگی 1ی فەرمانبەران دەكرێت و هیچ لێبڕین و باجێك ناخرێتە سەر مووچە و بە تەواوی دابەش دەكرێت.

هاوكات، بەپێی نووسراوێكی وەزارەتی دارایی هەرێم، كە ئاڕاستەی گەنجینەكان كراوە، لە ڕۆژی یەك شەممەی داهاتوو 24-1-2021 دەست دەكرێت بە دابەشكردنی مووچەی مانگی 1ی فەرمانبەران بە ڕێژەی لێبڕینی 21% بۆ فەرمانبەران و 50% بۆ پلەباڵاكان.

بۆ وەرگرتنی زانیاری لەوبارەیەوە (خەڵك) پەیوەندی كرد بە ئاوات جەناب نوری، وەزیری دارایی و ئابووری حكومەتی هەرێمەوە و نووسینگەكەی ڕایگەیاند، كە “ئاگاداری دەكەنەوە” بەڵام هیچ وەڵامێك لەلایەن وەزیرەوە نەبوو.

هەرێم دووبارە لیستی مووچە لەگەڵ عیراق ڕێكدەخاتەوە
لە ساڵی ڕابردوودا لە كۆبوونەوەی ئەنجوومەنی وەزیران لە 7-10-2020 بڕیار درا مووچەی مانگی (4 و 5 و 6 و 7 و 8)ی فەرمانبەران پاشەكەوت بكرێت بەبیانووی ڕێكخستنەوەی لیستی مووچە لەگەڵ عیراق و لە ئێستاشدا جارێكی دیكە بۆ ڕێككردنەوەی لیستی مووچە لەگەڵ عیراق مووچەی مانگەكانی (11 و 12)ی فەرمانبەرانیش پاشەكەوت دەكرێت یاخود وەك لێبڕینی مووچەكە هیچ ئاسەوارێكی قەرزی پێوە دیار نابێت.

بەو پێیەش حكومەتی هەرێم تەنها 5 مووچەی ساڵی ڕابردووی بەسەر فەرمانبەراندا دابەشكردووە، كە یەك مووچەی بە تەواوی و مووچەیەك بە لێبڕینی 18% و 3 مووچەش بە لێبڕینی 21% و بەوەش 7 مووچە پاسەكەوت كرا یان وەك لێبڕینی مووچەكە هیچ ئاسەوارێكی قەرزی لەسەر حكومەت پێوە دیار نابێت.

مووچە دەبێتە مانگانە و بەلێبڕینەوە
ئەمە لەكاتێكدایە، كە میدیاكانی پارتی بڵاویانكردەوە، “سەرۆكی حكومەتی هەرێم بڕیاریداوە لە ساڵی 2021دا هەموو 30 ڕۆژ جارێكك و مانگانە لەدوای 20ی مانگەوە دەست بە دابەشكردنی مووچە بكرێت بەپێی داهاتی بەردەستی وەزارەتی دارایی و بۆ ئەوەش وەزیر ڕاسپێردراوە بۆ دیاری كردنی لێبڕینی مووچەی مانگانە”.

لە ئێستادا بەهۆی زیادبوونی داهاتی ناوخۆ و كەمبوونەوەی خەرجی كۆرۆنا لەسەر حكومەت و بەرزبوونەوەی نرخی نەوت لە بازاڕی جیهانی، داهاتی هەرێم زیادی كردووە، بەڵام هێشتا حكومەت دەستبەرداری لێبڕینی مووچە نەبووە.