شەپۆلێكی بەفر بارین ناو شارەكانی هەرێم دەگرێتەوە

سەردێر

خەڵك- بەشی هەواڵ

بەپێی ڕاپۆرتە كەشناسییەكان، لە ئەمشەوەوە قۆناغی دوەمی شەپۆلی بەفر و باران ناوچەكانی هەرێمی كوردستان دەگرێتەوە و سەرەتاش لەسنوری بادینان كاریگەری بەدیار دەكەوێت و بۆ ناوچەكانی تر دوادەكەوێت بۆ ڕۆژی چوار شەممە.

ڕەشەبا و سەرما دەستپێدەكات
محەمەد كەمال، شارەزای كەشناسی بۆ (خەڵك) ئاماژەی بەوەكرد، لەئێستادا هەورەكان لەدەریایی ناوەڕاستەوە بەشێكی داخلی كوردستان بووە و بەشی فراوانەكەی لەئێستادا گەشتۆتە ڕۆژئاوای كوردستان و كەناراوەكانی دەریای سپی، پێشبینی دەكەین لەدرەنگانێكی شەو یاخود سبەی چوار شەممە بگاتە سەرجەم ناوچەكان و بارانبارین بەشێوەی ناوبەناو دەست پێبكات بەگەرمیانیشەوە.

ئاماژەی بەوەشكرد، لە سبەی چوار شەممەوە بارستە هەوا ساردەكە داخڵی ناوچەكانی كوردستان دەبێت و لەنزیك نیوەڕۆوە ئەگەرەكانی بەفر بارین دەكرێتەوە بەشێكی شار و شارۆچكەكان و لەئێوارەی هەمان ڕۆژدا پێشبینی بەفرێكی چڕ دەكرێت لە سەرجەم ناوچە شاخاویەكان و سۆران و پێنجوێن و مەلەكان و هیران و چیاكانی سنوری پارێزگای سلێمانی و هەولێر و بادینان بەهەمان شێوە سەنتەری شاری هەڵەبجە و شاری ڕانیەش ئەگەری بەفر كراوە دەبێت.

لای خۆشیەوە، ئاراس جەبار، شارەزای كەشناسی بۆ (خەڵك) وتی، “لە ئەنجامی تێكەڵبوونی بارستە ھەوای ساردی جەمسەری خێرایی با زیاتر چالاك ئەبێت لەناوچە جیاجیاكاندا بەخێرایی ٢٠ تا ٣٥ كیلۆمەتر زیاتر لە كاتژمێرێكدا و پلەكانی گەرماش بەڕێژەیەكی زیاتر ڕوو لەنزمبوونەوە دەكات بەتێكرای ٣ تا ٦ پلەی سیلیزی”.

نزیكەی 50 سانتیمەتر بەفر دەبارێت
ئاراس جەبار وتیشی، “لە سنوری پارێزگای دھۆك بەفر بارین ئەبێت بە ڕێژەی ١٠ تا ٤٠ سانتیمەتر و لە ناوچە شاخاوییەكانی هەولێر ئاستی بەفربارین دەگاتە 10 بۆ 50 سانتیمەتر و لە تەواوی ئیدارەی ڕاپەڕین بە سەنترەی قەزا و ناحیەكانیشەوە بەفر بەڕێژەی 5 بۆ 30 سانتیمەتر دەبارێت”.

سەبارەت بە هەڵەبجە و سلێمانی ڕوونی كردەوە، كە بەفر لە سەنتەری شارەكان دەبارێت و دەگاتە نزیكەی 25 سانتیمەتر.

شەپۆلەكە دوو ڕۆژ دەخایەنێت
ئەو شارەزایەی بواری كەشناسی پێشبینی ئەوەش دەكات، “کاریگەری ئەم شەپۆلە کاتەکانی شەوی چوار شەممە لەسنوری پارێزگای دھۆک کۆتایی پێدێت لەناوچەکانی ڕۆژھەڵاتی ھەرێم تا کاتی ئێوارەی ڕۆژی پێنج شەممە بەشێوەی پچڕ پچڕ بەفر بارین بەردەوامی دەبێت”.

ئەمە لەكاتێكدایە، كە بەڕێوەبەرایەتی گشتی كەشناسی و بوومەلەرزەزانی هەرێم لە ڕاپۆرتێكدا ئاماژەی بەوەكردووە، سبەینێ چوار شەممە ئاسمان هەور و باراناوی دەبێت لە هەندێك ناوچە باران بارین زیاتر دەبێت و هاتنی بارستە هەوایەكی سارد لەگەڵ بارینی بەفر لەسەر ناوچە شاخاوییەكان و زیادبوونی با، هەروەها پێشبینیش دەكرێت لە سەنتەری پارێزگا و قەزا و ناحیەكان بەفر ببارێت.

كەشناسی ئاشكراشیكرد، كاریگەری ئەو شەپۆلەی ڕووی لە ناوچەكەمان كردووە بەردەوامی دەبێت بە باران بارین و بەفر بارین، سبەی چوار شەممە زیاتر كاریگەری ئەو شەپۆلە لەسەر بەشێك لە ناوچەكەمان بە تایبەتی ناوچە شاخاوییەكان و قەزا و ناحیەكانی ناوچە شاخاوییەكان و ئەگەری بەفر بارینیش لە سەنتەری پارێزگای دهۆك و سلێمانی ئەگەری بەفر بارینی دەبێت، كاریگەری ئەم شەپۆڵە لە ڕۆژی پێنج شەممە كۆتایی دێت.