سەردێر

هێزە ئەمنییەكان و پەڕلەمان زۆرترین پێشێلكاریان بەرامبەر ڕاگەیاندن كردووە

خەڵك-ئارام سەردار

بەپێی ڕاپۆرتی ڕێكخراوی پەیامنێران بۆ ماف و گەشەپێدان، لەماوەی یەك ساڵدا ٣٧٦ پێشێلكاری بەرامبەر بە ٥٦٤ ڕۆژنامەنووس و دەزگای ڕاگەیاندن كراوە.

هۆزان قادر، سەرۆكی ڕێكخراوی پەیامنێران بۆ ماف و گەشەپێدان لە كۆنفرانسێكی رۆژنامەوانیدا ڕایگەیاند، ئەو ئامارانەی دەیخەنەڕوو لەماوەی ساڵی ٢٠٢١ تۆماركراوە لەهەر چوار پارێزگاكەی هەرێم، سكاڵاكانیش كە تۆماركراوە لەسەر هێزە ئەمنیەكان بووە بەپلەی یەكەم، بەپلەی دووەم پەڕلەمانی كوردستان دێت كە ڕێگری كردووە لەڕووماڵكردنی كارەكانی لەلایەن ماڵپەڕەكان، بەپلەی سێیەمیش بەشێك لەدەزگاكانی حكومەتن پێشێلكاریان كردووە.

دەشڵێت، لەماوەی یەك ساڵدا ٣٧٦ پێشێلكاری بەرامبەر بە ٥٦٤ ڕۆژنامەنووس و دەزگای ڕاگەیاندن كراوە، داوا دەكەین كار بكرێت بۆ سنوورداركردنی پێشێلكارییەكان.

بەپێی ناوەڕۆكی ڕاپۆرتەكە ١٤٦ ڕێگری كراوە لەڕووماڵكردنی كارو چاڵاكییەكان، ۹ ڕۆژنامەنووسیش دەستگیركراون، ٢٦ حاڵەتی هێرش و سووكایەتی و ۲ حاڵەتی هەڕەشە و ١٤٠ حاڵەتی نانبڕاوكردن هەبوون لەگەڵ چەندین پێشێلكاری دیكە.