سەردێر

كۆمسیۆن: وێستگەیەكی هەولێر تانەی لەسەرە و دەنگەكانی بەدەست دەژمێردرێنەوە

خەڵك-
كۆمسیۆنی باڵای سەربەخۆی هەڵبژاردن لە عیراق، حەوت سكاڵای تایبەت بە هەڵبژاردنەكەی ئەم دواییە پەسەند دەكات كە یەكێكیان لە هەولێرە، بۆیە دەنگی حەوت وێستگە بە دەستی دەژمێردرێتەوە و پێشبینیش دەكرێت، گۆڕانكاریی نوێ لە ئەنجامی هەڵبژاردنەكەدا دروست ببێت.

بەپێی بەیاننامەیەك كە لەلایەن كۆمسیۆنی باڵای سەربەخۆی هەڵبژاردن بڵاوكرایەوە”دەستكراوە بە لێكۆڵینەوە و بەدواداچوون بۆ ئەو سكاڵایانەی لەلایەن كاندید و لایەنەكانەوە سەبارەت بە پێشێلكارییەكانی هەڵبژاردن بۆیان رەوانەكراوە كە 181 سكاڵا لەخۆدەگرن”.

هەر لە بەیاننامەكەدا هاتووە”لەكۆی ئەو سكاڵایانە 174 سكاڵایان ڕەتكرانەوە و حەوت سكاڵاشیان قبوڵ كران كە بەمشێوەیەن، بەغدا دوو سكاڵا، نەینەوا سێ سكاڵا، هەولێر یەك سكاڵا و بەسڕە یەك سكاڵا”.

كۆمسیۆنی باڵای سەربەخۆی هەڵبژاردن لە عیراق دەڵێت”بەپێی مادەی 38 لەیاسای هەڵبژاردن لە عیراق، دەنگی ئەو وێستگانەی ئەو حەوت سكاڵایە دەیانگرێتەوە بە دەستی و بە ئامادەبوونی نوێنەری كاندید و لایەنەكان دەژمێردرێنەوە”.