سەردێر

وتەبێژی بزووتنەوەی ئیسلامی وەڵامی فازڵ میرانی دەداتەوە

خەڵك

وتەبێژی بزووتنەوەی ئیسلامی كوردستان وەڵامی سكرتێری مەكتەبی سیاسیی پارتی دیموكراتی كوردستان دەداتەوە و ڕایدەگەیەنێت: “ئێمە بایكۆتی هەڵبژاردنەكانی پەرلەمانی عیراقمان كردووە و دەنگیش بە هیچ حزب و لیست و كاندیدێك نادەین”.
عەبدوڵا وەرتی وتەبێژی بزووتنەوەی ئیسلامی كوردستان لە ڕاگەیەنراوێكدا ڕاگەیاند: “دوای ئەوەی بەڕێز فازڵ میرانی، سكرتێری مەكتەبی سیاسیی پارتی دیموكراتی كوردستان لە بەرنامەیەكی كەناڵی ڕووداو ئاماژەی بەوەكرد كە بزووتنەوە دەنگ بە كاندیدانی پارتی دەدەن، لە بەرامبەر ئەم قسانەی بەرپرسەكەی پارتیدا وتەبێژی بزووتنەوەی ئیسلامی ڕایگەیاند: زۆر بە سەر سوڕمانەوە گوێمان لەو قسانە بوو، چونكە ئێمە وەك بزووتنەوەی ئیسلامی كودستان ڕێككەوتن و لێكتێگەیشتنمان نییە لەگەڵ هیچ لایەنێكی سیاسیی كوردستان، بە ڕوون و ئاشكراش ڕامانگەیاندووە كە بزووتنەوەی ئیسلامی بایكۆتی هەڵبژاردنەكانی پەرلەمانی عیراقی كردووە و دەنگیش بە هیچ حزب و لیست و كاندیدێك نادات”.

وتەبێژی بزووتنەوەی ئیسلامی كوردستان ئاماژی بەوەشداوە:”دوێنێش لە پارێزگای هەڵەبجە بەڕێز ڕابەری گشتی لە كۆڕێكی جەماوەریدا ئەوەی دووپاتكردەوە و داواشی لە ئەندامان و لایەنگرانی بزووتنەوە و خەڵكی كوردستان كرد بایكۆتی هەڵبژاردن بكەن، بۆیە با هیچ كەس و لایەنێك هیوا لەسەر دەنگەكانی بزووتنەوە هەڵنەچنێت”.