سەردێر

وەزارەتی كارەبا: تاكۆتایی ئەمساڵ بەستنی پێوەری زیرەك تەواو دەبێت

خەڵك

بەڕێوەبەری دیوانی وەزارەتی كارەبا ڕایدەگەیەنێت، تا كۆتایی ئەمساڵ بەستنی پێوەری زیرەكی كارەبا بۆ هاوبەشان تەواو دەبێت، دەشڵێت، “وەزارەت جەختدەكاتەوە ساڵی داهاتوو هەموو هاوبەشان پێوەری زیرەكیان بەستبێت”.
ئەردەڵان شوكری بەڕێوەبەری دیوانی وەزارەتی كارەبای هەرێم ڕایگەیاند، وەزارەتەكەیان زیاتر لە تریلیۆنێك دینار قەرزی لەلای هاوبەشانییەتی و ئەوەی قەرزی زۆری لەسەر بێت، بۆی دەكرێت بە 12 قیست.

ئاماژەی بەوەشدا”وەزارەتی كارەبا دەسەڵاتەكانی بۆ بەڕێوەبەرایەتییەكانی لە پارێزگاكان دابەزاندووە بۆ ئەوەی ئەو قەرزەی كرێی كارەبایە و لەلای هاوبەشانی كارەبایە و كەڵەكە بووە بۆیان بكرێتە 12 قیست و بیدەنەوە، ئەم كار ئاسانییە ئەو كەسانە دەگرێتەوە كە قەرزەكانی سەریان زۆرە و دوای بڕیارەكە دانەوەی قەرزەكان زیادیكردووە.”

سەبارەت بە شێوازی قەرزی فەرمانگە حكومییەكانیش، ئەو بەڕێوەبەرەی وەزارەتی كارەبا ئەوەی خستەڕوو، “ئەوانیش قەرزەكان دەگەڕێننەوە و هی ئەمان بە ناردنی پارەكەیە لە هەژماری پارەی وەزارەتەكانەوە بۆ وەزارەتی كارەبا.”

ئەردەڵان شوكری، بەڕێوەبەری دیوانی وەزارەتی كارەبا لەبارەی بەستنی پێوەری زیرەكیشەوە ڕایگەیاند “تائێستا 910 هەزار پێوەر لەكۆی ئەو یەك ملیۆن و 500 هەزار پێوەرەی گرێبەستی دانانیان كرابوو، دانراون و ڕۆژانە ژمارەی هاوبەشانی كارەبا لە زیادبووندان”.