سەردێر

پۆلیسی سلێمانی: سێ‌ كەس بە 14 ملیۆن دیناری ساختەوە دەستگیر كران

خەڵك

بەڕێوەبەرایەتی پۆلیسی پارێزگای سلێمانی ئاشكرای كرد، سێ‌ كەس دەستگیر كراون كە دراوی ساختەیان لە دوكانەكان ساغ كردووەتەوە و لەكاتی دەستگیر كردنیشیاندا دەست بەسەر 14 ملیۆن دیناری ساختەدا گیراوە.


بەڕێوەبەرایەتی پۆلیسی پارێزگای سلێمانی لە بڵاوكراوەیەكدا ئاماژەی بەوەداوە، ڕۆژی 7ی ئابی 2021، چەند خاوەن دوكانێك بنكەی پۆلیسی سەرایان ئاگادار كردەوە كە لەكاتی مامەڵەكیاندا پارەی ساختەیان دراوەتێ، بنكەی پۆلیسی سەرا لێكۆڵینەوەو بەدواداچوونەكانی دەستپێكرد و گومان خرایە سەر دوو تۆمەتبار.

ئەوەش هاتووە، توانرا لە ڕۆژی 11ی ئابی 2021 هەردوو تۆمەتبار كە لە دایكبووی ساڵانی 1979 و 1979ن دەستگیربكرێن، لەكاتی دەستگیركردنیاندا دەستیشگیرا بەسەر بڕی 14 ملیۆن دیناری عیراقی ساختەدا لەگەڵ بڕێك دۆلاری ئەمریكی ساختە و ئوتۆمبێلێك كە بەتۆمەتبارەكان بووە.

پۆلیسی سلێمانی جەختی لەوەش كردووەتەوە، لەلایەكی ترەوە مەفرەزەكانی بنكەی پۆلیسی ڕزگاری تۆمەتبارێكیان لەشەقامی سالمی سلێمانی دەستگیركرد كە لەدایكبووی 1999یە و بڕێك دراوی بیانی ساختەی پێبوە و بەنیاز بووە ساغی بكاتەوە، لەئێستادا هەرسێ تۆمەتبارەكە كە كوردن بەبڕیاری دادوەر راگیراون و لێكۆڵینەوەكان بەردەوامن.