سەردێر

ئاسایشی گەرمیان: باندێكی دزینی ئۆتۆمبێل دەستگیركران

خەڵك

ئاسایشی گەرمیان باندێكی دزینی ئۆتۆمبێلی دەستگیركرد كە ویستویانە ئەو ئۆتۆمبێلەی لە كانی شەیتان لە نێوان چەمچەماڵ و سلێمانی دزیبوویان، بیبەن لە سنووری خانەقین ساغی بكەنەوە.
عوسمان عەبدولكەریم لێپرسراوی ڕاگەیاندنی ئاسایشی گەرمیان لە كۆنفڕانسێكی ڕۆژنامەوانیدا ڕایگەیاند، شەوی پێنج لەسەر شەشی ئەم مانگە ھێزەكانی ئاسایشی گەرمیان ئاگاداركرانەوە كە ئۆتۆمبێلی ھاووڵاتییەك لە كانی شەیتان دزراوە و دوای لێكۆڵینەوە تۆمەتبارەكان لە بازگەی سماق لە ناوچەی سەنگاو دەستگیركران.

لێپرسراوی ڕاگەیاندنی ئاسایشی گەرمیان وتیشی، تۆمەتبارەكان پێكهاتبوون لە دوو كەس، یەكیان خەڵكی سەیدسادقە و ئەوی تریان سلێمانی، فەرمانی دەستگیركردن بۆ كەسێكی تریش دەرچووە كە ھاوكاریان بووە لە دزییەكە.