سەردێر

ڕوونكردنەوەیەك لەبارەی ڕزگاركردنی 14 پەنابەر

خەڵك-
فیدراسیۆنی سەراسەری پەنابەرانی عێراق لەبارەی ڕزگاركردنی 14 پەنابەرەوە كە بەمدواییە ڕزگاركردنیان ڕاگەیەنرا ڕونكردنەوە دەدات و دەڵێت پەیوەندیان بەو یەختەوە نییە كە لە 21ی ئەم مانگە ژێرئاو كەوت و ژمارەیەك پەنابەری كورد تێیدا بێسەروشوێن بوون.

هیوا خدر، ئەندامی فیدراسیۆنی سەراسەری پەنابەرانی عێراقی لە توركیا ڕایگەیاند:”ئەو 14 پەنابەرەی ڕزگاركراون هیچ پەیوەندی نییە بەو یەختەوە كە لە 21ی تەمموز ژێرئاو كەوت و زۆربەی پەنابەرەكانی كورد بوون، بەڵكو ڕزگاركردنی ئەو پەنابەرانە دەگەڕێتەوە بۆ ڕێكەوتی 19ی تەمموز، واتە دوو ڕۆژ پێش ژێرئاوكەوتنی بەلەمی پەنابەرە كوردەكان، بەڵام هەواڵی ڕزگاركردنیان لەلایەن ڕاگەیاندنەكانی توركیاوە لە 27ی ئەم مانگە بڵاوكرایەوە”.

بە وتەی ئەندامەكەی فیدراسیۆنی پەنابەران:” هۆكاری درەنگ بڵاوبوونەوەی هەواڵەكەش بۆ پۆلیسی ئێشكگری دەریایی توركیا دەگەڕێَتەوە”.

لە 22ی ئەم مانگە بەلەمێك كە بە ژمارەیەك كۆچبەرەوە لە توركیاوە بەرەو ئیتاڵیا بەڕێكەوت و بەشێكیان هاوڵاتیی كوردی هەرێمی كوردستان بوون، لە دوورگەی كریتی یۆنانی نوقم بوو، لەو ڕووداوەشدا بەشێكی زۆری كۆچبەرانی نێو بەلەمەكە ڕزگاركران و ژمارەیەكیشیان تائێستا بێسەروشوێنن و چارەنوسیان نادیارە.

هەر لەو بارەیەوە، دەزگای لوتكە بۆ كاروباری پەنابەران ڕایگەیاندبوو”لە ڕووداوەكەدا 10 كۆچبەر بێسەروشوێنن كە دووانیان میسریین و كەسێكی ڕۆژهەڵاتی كوردستان و حەوت كۆچبەریشیان هاوڵاتی هەرێمی كوردستانن”.