سەردێر

پەیكەری خودناسی پەردەی لە سەر لادرا

خەڵك – یەحیا حبیب

ئەمڕۆ سێشەممە، بە ئامادەبونی ژمارەیەك لە لێپرسراوان و ڕۆشنبیرانی شارۆچكەی شارەزوور پەردە لە سەر پەیكەری خودناسی لادرا.

عومەر جەمیل، هونەرمەندی پەیكەرساز لە لێدوانێكیدا بە (تۆڕی میدیایی خەڵك)ی ڕاگەیاند، ئەم پەیكەرە وەك بیرۆكە هەبووە لە تۆڕە كۆمەڵایەتییەكاندا، بەڵام لە سەر داوای بەڕێوبەری پێشووی ڕۆشنبیری و هونەری شارەزوور دەستمان بە دروستكردنی پەیكەرەكە كرد و گۆڕانكاریمان لە جوڵەی پەیكەرەكەدا كرد.

پەیكەرەكە لە بەرامبەر بەڕێوبەرێتی ڕۆشنبیری و هونەری شارەزوور نزیك پاركی نالی لە هەڵەبجەی تازە ناوەندی شارۆچكەی شارەزوور دانراوە و لە ڕێوڕەسمێكدا پەردەی لە سەر لادراوە.

وتیشی، پەیكەرەكە لە فیگەری كچێكدایە كە لە جێگای سەری كتێبە و سەریشی بە دەستییەوەیەتی و بەرزی كردووەتەوە و ناوی لێنراوە پەیكەری خودناسی.

عومەر جەمیل ئاشكرایكرد، پەیكەرەكە بەرزییەكەی دوو مەترە و لە ماددەی فایبەر گڵاس پۆلیستەر دروستكراوە ماوەی دوو مانگی پێ چوو بۆ تەواوبوونی و لە لایەن ڕۆشنبیری و هونەری شارەزوورەوە تێچووەكەی لە ئەستۆ گیراوە.

پەیكەری خودناسی، سێیەم پەیكەرە كە لە شارۆچكەی شارەزوور دادەنرێت و لە چەند ساڵی ڕابردوودا پەیكەری شاعیری گەورەی كورد مەولەوی- یان لە دەروازەی شارۆچكەی وارماوا دانا كە هەمان پەیكەرساز لە ماددەی فایبەر گڵاس دروستی كردبوو.