سەردێر

پۆلیسی هەولێر: بكوژی ژنێك دەستگیركرا

خەڵك

بەڕێوەبەرایەتی پۆلیسی پارێزگای هەولێر ڕایدەگەیەنێت: بكوژی ژنەكەی ئەمڕۆی كۆمەڵگای مەلائۆمەر لە دواین خاڵی پشكنینی نێوان توركیا و هەرێمی كوردستان دەستگیر كرا.

بەڕێوەبەرایەتی پۆلیسی پارێزگای هەولێر لە ڕاگەیەنراوێكدا ڕایگەیاند: دوای ئەوەی ئەمڕۆ هەینی كاتژمێر (7:28 خولەكی بەیانی) بەشی پۆلیسی دەشتی هەولێر، بنكەی پۆلیسی (شاوێس)ی سەر بە بەڕێوەبەرایەتییەكەیان لە ڕووداوی كوشتنی ژنێك بە چەقۆ لەلایەن هاوسەرەكەیەوە لە كۆمەڵگای (مەلائۆمەر) لەسەر كێشەیەكی خێزانی بە ناوی (عائیشە مەحمود محەمەد) خاوەن پێنج منداڵ و (تەمەن 42 ساڵ) ئاگادار كرانەوە، دەستبەجێ دەست بە لێكۆڵینەوە و بەدواداچوونی چڕ كرا و دەركەوت كە تۆمەتبار لە شوێنی ڕووداو هەڵاتبوو.

بەڕێوەبەرایەتی پۆلیسی پارێزگای هەولێر ئەوەشی خستووەتەڕوو، دوای ڕووداوەكە بە زوویی پەڕاوی لێكۆڵینەوەی بۆ ڕێكخرا و دەستبەجێ‌ فەرمانی دەستگیركردنی بكوژەكە بەپێی ماددە (406) لە یاسای سزادان بەسەر هەموو بازگە و خاڵەكانی پشكنین و سەرجەم بەڕێوەبەرایەتی و بەشەكاندا گشتێنرا و توانرا هەر ئەمڕۆ 2/7/2021، بكوژی ژنەكە بە ناوی (ن. ع. م) لە ماوەی پێنج كاتژمێر لە دواین خاڵی پشكنینی نێوان توركیا و هەرێمی كوردستان، دەستگیر بكرێت.

بەڕێوەبەرایەتی پۆلیسی پارێزگای هەولێر ئاماژەی بەوەشداوە: تۆمەتباری ناوبراو، كە وتەی وەرگیرا و دانی نا بە تاوانەكەیدا، بە هاوكاریی و هەماهەنگیی بەڕێوەبەرایەتیی پۆلیسی سۆران و بەڕێوەبەرایەتیی ئاسایشی مێرگەسوور/ بازگەكان و هەروەها بەڕێوەبەرایەتیی ئاسایشی سۆران/ بەشی جووڵانەوە، قۆڵبەست كرا.