سەردێر

وەزارەتی شارەوانی: پڕۆسەی گەیاندنی خزمەتگوزاری بە گەڕەكی 8ی حەسارۆك دەستپێدەكات

خەڵك

وەزارەتی شارەوانی و گەشتوگوزار ڕایدەگەیەنێت: پڕۆسەی گەیاندنی خزمەتگوزاری بە گەڕەكی 8ی حەسارۆك دەستپێدەكات.

وەزارەتی شارەوانی و گەشتوگوزار لە ڕاگەیەنراوێكدا ڕایگەیاند، ئەمڕۆ پێنجشەممە (20ی ئایاری 2021) لە دیوانی پارێزگای هەولێر، بە سەرپەرشتی ساسان عەونی وەزیری شارەوانی و گەشتوگوزار و بە بەشداری ئومێد خۆشناو پارێزگاری هەولێر و ژمارەیەكی تر لە بەرپرسانی شارەوانی و پارێزگەی هەولێر، بە مەبەستی جێبەجێكردنی بڕیار و راسپاردەكانی سەرۆكی حكومەتی هەرێمی كوردستان بۆ گەیاندنی خزمەتگوزاری بە گەڕەكی 8ی حەسارۆك، كۆبوونەوەیەكی فراوان لەگەڵ فەرمانگە خزمەتگوزارییەكانی شارەوانی و فەرمانگەی پەیوەندیدار بە بابەتەكە بەڕێوەچوو.

لە كۆبوونەوەكەدا بە وردی میكانیزم و چۆنیەتی گەیاندنی خزمەتگوزاری و دەستپێكردنی پرۆسەی پەرەپێدان و جێبەجێكردنی پڕۆژە خزمەتگوزارییەكان لە گەڕەكی 8ی حەسارۆك تاووتوێ كران بۆ ئەوەی بەزووترین كات بڕیاری گەیاندنی خزمەتگوزاری لەو گەڕەكە جێبەجێ بكرێت و ئاسانكاری بۆ هاووڵاتییان بكرێت لە هەموو ڕوویەكەوە.

جێی ئاماژەیە، هەفتەی ڕابردوو، مەسرور بارزانی سەرۆكی حكومەتی هەرێمی كوردستان لە سەردانێكیدا بۆ سەر زەوییەكانی گەڕەكی 8ی حەسارۆكی شاری هەولێر بڕیاری دا بە پێدانی مۆڵەتی بیناكردن و گەیاندنی خزمەتگوزاری بۆ ئەو گەڕەكە.