سەردێر

زیاتر لە 13 گوند بەهۆی بۆردومانەكانی توركیاوە چۆڵكران

خەڵك-
بەهۆی بۆردومانەكانی توركیاوە بۆ ناوچەكانی قەزای ئامێدی لە پارێزگای دهۆك، دانیشتوانی زیاتر لە 13 گوند، ناوچەكانیان چۆڵ دەكەن و ڕوو لە شارەكان دەكەن.

عومەر سورچی ئەندامی ئەنجومەنی قەزای ئامێدی لەو بارەیەوە ڕایگەیاند”بۆردوەمانكرنی نێوان توركیا و پارتی كرێكارانی كوردستان بەردەوامن، هێزەكانی توركیا دەیانەوێت لە پارێزگای دهۆك و لە چوارچێوەی قەزای ئامێدی، زیاتر بێنە نێو قوڵایی خاكی عیراق، ئەو ئۆپەراسیۆنانەش بوونەتە مایەی راگواستنی دانیشتوانی 13 گوند لە قەزاكە”.

بە وتەی عومەر سورچی”سیستمی كارەبا وێران بووە، وێڕای سوتانی باخ و كێڵگە و بەروبوومە كشتوكاڵییەكان، ئەمەش لەكاتێكدایە كە هێزەكانی توركیا دەیانەویت بنكەی زیاتر لە لوتكەی چیای مەتین دابنێن و گەریلاكانی پارتی كرێكارانی كوردستانیش بەردەوامن لە بەرپەرچدانەوەی هێزەكانی توركیا و ڕووبەڕووبوونەوەیان”.

هێزەكانی سوپای توركیا بۆ زیاتر لە هەفتەیەك دەچێت، بەردەوامن لە بۆردومانی سنورەكانی پارێزگای دهۆك و دەڵێن لەو بۆرومانانەدا گەریلاكاتی پارتی كرێكارانی كوردستان (پەكەكە) دەكەنە ئامانج كە لەلایەن ئەنقەرەوە بە “تیرۆریست” دادەنرێت.