سەردێر

16 فڕاكسیۆنی پەرلەمانی كوردستان ڕاگەیەنراوێكی هاوبەشیان بڵاوكردەوە

خەڵك

16 فڕاكسیۆنی پەرلەمانی كوردستان ڕاگەیەنراوێكی هاوبەشیان لەبارەی پەلامارەكەی دوێنێ شەوی داعش بۆ سەر هێزی پێشمەرگە بڵاوكردەوە و ڕایدەگەیەنن، ھێشتا ئێمە لەبەردەم ھەرەشەی دوژمنان و تیرۆرداین و مەترسییەكانی سەر قەوارەكەمان كەم نین، ھەربۆیە لە ئێستادا زیاتر لە ھەركاتێك كوردستان پێویستی بە تەبایی و یەكڕیزی ھەیە.

دەقی ڕاگەیەنراوەكە:

بەداخەوە جارێكی دیكە بەھۆی ھێرشی تیرۆرستانی داعش بۆ سەر سەنگەرەكانی ھێزی پێشمەرگەی كوردستان لە سنوری پردێ ، پۆلێك لە پێشمەرگەی دلسۆزی خاك و نیشتیمان شەھید و بریندار بوون .
بەناوی فراكسیۆنە جیاوازەكانی پەرلەمانی كوردستان وێرای ئیدانەكردنی ئەو پەلامارە تیرۆرستیەی شەوی رابردوو ، پرسەو ھاوخەمی خۆمان ئاراستەی كەسوكاری سەربەرزی شەھیدان دەكەین و ھیوای زوو چاك بوونەوە بۆ بریندارەكان دەخوازین .
ئاشكرایە پەلاماری تیرۆرستان لە شەوی رابردوو دەرخەری ئەو راستیەیە ، ھێشتا ئێمە لەبەردەم ھەرەشەی دوژمنان و تیرۆرداین و مەترسییەكانی سەر قەوارەكەمان كەم نین، ھەربۆیە لە ئێستادا زیاتر لە ھەركاتێك كوردستان پێویستی بە تەبایی و یەكریزی ھەیە ، باوەرمان وایە تەنھا بە یەكێتی و یەكڕیزی و پێكەوە بوونمان دەتوانین رووبەروی پیلانی تیرۆرستان و دوژمنانی میللەتەكەمان ببینەوە .
ئەم بۆشاییە ئەمنییانەی كەلەدوای نەمانی پێشمەرگە لەناوچە كوردستانیەكاندا درووستبوون ھەمیشە بە زیان بۆ خەڵكی ناوچە كوردستانییەكانی دەرەوەی ئیدارەی ھەرێم شكاونەتەوەو تیرۆریستان سوودییان لەم كەلێنەنانە وەرگرتووە تا دەستی ڕەشیان نیشان بدەنەوە.
پێویستە ھەرچی زووە ھێزی پێشمەرگەی كوردستان و سوپای عیراقی بە ھاوبەشی پارێزگاری لەو ناوچانە بكەن و ئەم ڕووداوە نیشانمان دەداتەوە نەبوونی پێشمەرگە لەو ناچانەدا چەند زیانبەخشبووە.
دڵنیاین ئیرادەی خۆراگری گەلەكەمان ورەی پۆڵاینی ھێزی پێشمەرگەی كوردستان زۆر لە پەلاماری ترسنۆكانەی تیرۆرستان بەھێزترە.
گیانی شەھیدانمان شاد،خودا ئارامی و سەبووری بەھەموو لایەكمان بداتو بریندارەكان بێ شیفا نەكات.

فراكسیۆنی پارتی دیموكراتی كوردستان
فراكسیۆنی یەكێتیی نیشتمانیی كوردستان
فراكسیۆنی گۆڕان
فراكسیۆنی كۆمەڵی دادگەری كوردستان
فراكسیۆنی یەكگرتووی ئیسلامی كوردستان
فراكسیۆنی ھاوپەیمانی یەكێتی نەتەوەیی
فراكسیۆنی پارتی گەشەپێدانی توركمانی
فراكسیۆنی سەردەم
فراكسیۆنی ئەنجومەنی گەلی كلدانی سریانی ئاشوری
فراكسیۆنی میللەت
فراكسیۆنی پارتی چاكسازی توركمانی
فراكسیۆنی ئازادی
فراكسیۆنی رافیدەین
فراكسیۆنی ئازادی
فراكسیۆنی بەرەی توركمانی
فراكسیۆنی ئەرمەن

1-5-2021