سەردێر

حاجی ئۆمەران.. بەهۆی مینەوە هاووڵاتییەك قاچێكی لەدەستدا

خەڵك

دوای نیوەڕۆی ئەمڕۆ هاووڵاتییەك لەكاتی كۆكردنەوەی گژوگیای بەهارە لەچیای كۆدۆ لە سنووری حاجی ئۆمەران، مینێكی پێداتەقییەوە و بەسەختی برینداربوو.

ڕابەر ئەنوەر، لێپرسراوی ڕاگەیاندنی دەزگای كاروباری مین ــ هەولێر ڕایگەیاند، لە كاتژمێر 3:00ی دوانیوەڕۆی ئەمڕۆ، هاووڵاتییەك بەناوی ئەرسەلان محەمەد وسۆ، دانیشتووی شارەدێی حاجی ئۆمەران لەچیای كۆدۆ، لەكاتی گەڕان بۆ گژوگیای بەهارە، مینێكی تاكەكەسی پێدا تەقیوەتەوە و بەهۆیەوە قاچێكی لەدەستداوە.

ئەوەشی خستەڕوو، لەماوەی ئەمساڵدا 5 كەس لەسنووری پارێزگای هەولێر بەر مین كەوتوون و كەسێك گیانی لەدەستداوە و چواریشیان برینداربوونە.

جێی ئاماژەیە، ئەو هاووڵاتییەی ئەمڕۆ بەر مین كەوتووە خێزاندارە و دانیشتووی شارەدێی حاجی ئۆمەرانە و فەرمانبەری فەرمانگەی كارەبای حاجی ئۆمەرانە.