سەردێر

وەزیری پێشمەرگە: لەسەر كفری وەڵامی كەمەرشكێنمان دەبێت

خەڵك

وەزیری پێشمەرگە میحوەری 2ی قەرەتەپە – حەمرین و لیواكانی 16 و 17ی پیادەی لە سنووری گەرمیان بەسەركردەوە و لەبارەی هێرشە مووشەكییەكەی سەر كفری ڕایگەیاند، “هێزی پێشمەرگەی كوردستان بۆ هەر كردەیەكی تیرۆریستیی لەو شێوەیە، وەڵامی تووند و كەمەرشكێنی دەبێت”.

وەزارەتی پێشمەرگە لە ڕاگەیەنراوێكدا بڵاویكردەوە، شۆڕش ئیسماعیل وەزیری پێشمەرگەی هەرێمی كوردستان لەمیانی سەردانەكەیدا كە ئەمڕۆ یەكشەممە 25ی نیسان ئەنجامیدا، دیدارێكی لەگەڵ فەرماندەی لیواكان و بەرپرسانی باڵای میحوەرەكە كردووە و ڕایگەیاندووە “نیگەرانیی قوڵی خۆمان دەردەبڕین لەسەر ئەو كردەوە تیرۆریستییە ترسنۆكانەی تاریكپەرستان، كە دوو كاتیۆشایان ئاڕاستەی شاری كفریی ئازیز كرد”.

وەزیری پێشمەرگە دەڵێت “لێرەوە ڕایدەگەیەنین، كردەوەی ترسنۆكانەی لەو شێوەیەی تیرۆریستانی داعش، سەقامگیری و ئارامی و ئاسایشی ناوچەكە ناشێوێنێت، هێزی پێشمەرگەی كوردستانیش بۆ هەر كردەیەكی تیرۆریستیی لەو شێوەیە وەڵامی توند و كەمەرشكێنی دەبێت”.

لە بەشێكی دیكەی گوتەكانیدا، شۆڕش ئیسماعیل ئاماژەی بەوە كردووە “ئێوە (هێزەكانی پێشمەرگە) لە ‌سنووری گەرمیاندان، ناوچەیەك بە ‌درێژایی مێژوو ناوەندی خەبات و قوربانیدانی زۆر و گەورە بووە، ڕۆڵە ئازاكانی خاوەن داستانی زۆرن لە ‌ڕووبەڕووبوونەوەی زوڵم و ستەمەكانی ڕژێمی لەناوچوو، بۆیە گومانی تێدانییە ئەمڕۆ ئێوە و نەوە ئازاكانی ئێرە و گەلەكەمان ڕێگە بە ‌تیرۆریستان و دەستە و گرووپی تیرۆریستی نادات ئارامی و سەقامگیریی ناوچەكە بشێوێنێت”.