سەردێر

“هیچ ڕێوڕەسمێك بۆ یادی بۆردوومانكردن و ڕاپەڕینی قەڵادزێ ئەنجام نادرێت”

خەڵك

قائیمقامی قەڵادزێ ڕایدەگەیەنێت: بەهۆی كۆرۆناوە لە یادەكانی كارەساتی بۆردوومانی قەڵادزێ و ڕاپەڕینی ئەو شارە هیچ ڕێورەسمێك بەڕێوەناچێت.

بەكر بایز قائیمقامی قەڵادزێ لە كۆنفڕانسێكی ڕۆژنامەوانیدا ڕایگەیاند: لە 24ی نیسان یادی كارەساتی بۆردوومانی 1974ی قەڵادزێ و هەمان مێژووش لە ساڵی 1982 یادی ڕاپەڕینی خەڵكی بەشەرەفی قەڵادزێییە، ئەم دوو یادە لە مێژووی خەبات و قوربانیدانی ناوچەی پشدەردا هەمیشە لە یادی نەوە لەدوای نەوەی گەلی كوردستاندا زیندووە، كە لەو كاتەدا لەلایەن ڕژێمی فاشیستی ئەوكاتەی عیراق بە چەكی ناپاڵم و قەدەغەكراو بۆردوومانی خەڵكی بێتاوانی ئەم دەڤەرە كرا و تێیدا زانكۆی سلێمانی خاپوركرا و چەندین هاووڵاتی مەدەنی و خوێندكاری تێدا شەهید و برینداربوون.

قائیمقامی قەڵادزێ ڕاشیگەیاند:”وێڕای دانەواندنی سەری ڕێزونەوازش بۆ ڕۆحی سەربەزی شەهیدانی ئەو كارەساتە، بەڵام وەك ئیدارەی ڕاپەڕین بۆ جێبەجێكردنی ڕێنماییە تەندروستییەكان و لە پێناو پاراستنی هاووڵاتییانمان لە پەتای كۆرۆنا كە نەخۆشییەكی مەترسیدارە و تەواوی جیهانی گرتووەتەوە، بۆیە بۆ ئەمساڵ، بڕیارمانداوە هیچ ڕێوڕەسمێك بۆ یادكردنەوەی ئەو كارەساتە لە دەڤەرەكە بەڕێوەنەچێت”.

جێی ئاماژەیە، لە 24/4/1974 لەلایەن ڕژێمی فاشیستی بەعسی ڕووخاو بە چەكی قەدەغەكراوی ناپاڵم بۆردوومانی قەڵادزێ كرا و ئەو كات كە زانكۆی سلێمانی لەوێ بوو چەندین خوێندكار و هاووڵاتی مەدەنی بێتاوان شەهید و برینداربوون و زیانێكی زۆریش بەو ئەو دەڤەرە كەوت ، هەمان ڕێكەوت لە 24/4/1982 هاووڵاتییانی قەڵادزێ دژی زوڵم و زۆری ڕژێمی ئەو كاتە، ڕاپەڕین.