سەردێر

هەسەدە عەمبارێكی پڕ لە چەك و تەقەمەنی داعش دەدۆزێتەوە

خەڵك-
هێزەكانی سوریای دیموكرات (هەسەدە)، عەمباریكی شاراوەی پڕ لە چەك و تەقەمەنی داعش لە شاری ڕەقە دەدۆزنەوە.

بەپێی ڕاگەیەندراوێك كە لەلایەن ناوەندی ڕاگەیاندنی (هەسەدە)ەوە بڵاوكرایەوە”یەكینە تایبەتەكانی سەر بە (هەسەدە)، ئەمڕۆ پێنج شەممە لە ئۆپەراسیۆنێكی ئەمنیدا حەشارگەیەك و عەمبارێكی پڕ لە چەك و تەقەمەنیان لە شاری ڕەقە دۆزییەوە، حەشارگە و عەمبارەكەش بۆ سەردەمی دەستگرتنی چەكدارانی داعش بەسەر ناوچەكەدا دەگەڕێتەوە”.

هەر لە ڕاگەیەندراوەكەدا هاتووە”حەشارگەكە بڕێكی زۆری چەكی سوك و مامناوەندی تێدايە، وێڕای تەقەمەنی جۆراوجۆر و بڕێكی زۆر مین و ماددەی تی ئێن تی”.

ناوەندی ڕاگەیاندنی (هەسەدە) دەڵێت، یەكینە تایبەتەكان لە هێزەكانی سوریای دیموكرات، توانییان ژمارەیەكی زۆر لەو مینانەش پوچەڵبكەنەوە كە لە چواردەوری حەشارگەكەدا چێنرابوون، ئەمەش لەكاتێكدایە حەشارگەكە ماڵی هاووڵاتییەك بووە و لەكاتی دەستگرتنی ڕێكخراوەكە بەسەر ناوچەكەدا، شارەكەیان بەجێهێشتووەو و هەڵاتوون.