سەردێر

ئەوقافی هەرێم یەكەم ڕۆژی ڕەمەزان دیاری دەكات

خەڵك-
سعودیە یەكەم ڕۆژی مانگی ڕەمەزانی ئەمساڵی دیاری كردووە و وەزارەتی ئەوقافی هەرێمیش ئاشكرای دەكات، لیژنەی بینینی مانگ كۆدەبێتەوە و بڕیار لەسەر یەكەم ڕۆژی ڕەمەزان دەدات.

بەپێی ڕۆژمێری (كۆچی) كە سعودیە كاری پێدەكات و بە فەرمی بڵاویكردۆتەوە، 12-4-2021 كۆتا ڕۆژی مانگی شەعبان-ە و ڕۆژی دواتر (13ی نیسان) كە دەكاتە ڕۆژی سێ‌ شەممە دەبێتە یەكەم ڕۆژی مانگی ڕەمەزانی پیرۆزی ساڵی 1442ی كۆچی.

نەبەز ئیسماعیل، وتەبێژی وەزارەتی ئەوقافی هەرێم بۆ (خەڵك) ڕایگەیاند، ئەو خشتە و حساباتە فەلەكیانەی بڵاودەكرێنەوە لە هەرێم كاریان پێ‌ ناكرێت بۆ دیاری كردنی مانگی كۆچی و ڕەمەزان و جەژن، بەڵكو لە هەرێم پشت بە بڕیاری لیژنەی بینینی مانگ دەبەسترێت، كە سەڵانە لەلایەن وەزارەتەوە پێكدەهێنرێت.

وتیشی، “ئەمساڵیش وەزارەتی ئەوقاف لیژنەی بۆ بینینی مانگ پێكهێناوە و لە كۆتا ڕۆژی مانگی (شەعبان) لیژنەكە كۆدەبێتەوە و چاودێری بینینی مانگ دەكات و ئەوان بڕیار لەسەر دیاری كردنی یەكەم ڕۆژی مانگی ڕەمەزانی پیرۆز دەدەن”.

جەختیشی كردەوە، وەزارەتی ئەوقاف و لیژنەی بینینی مانگ و ئەنجوومەنی باڵای فەتوای هەرێم ڕێكاری پێویست دەگرنەبەر و سبەی ئێوارە (ئێوارەی ڕۆژی یەك شەممە لەسەر دوو شەممە) لیژنەی بینینی مانگ لە سەرجەم پارێزگا و ئیدارەكانی هەرێم كۆدەبنەوە و بە هەماهەنگی لەگەڵ دیوانی وەقفی سوننەی عیراق بڕیار لە یەكەم ڕۆژی ڕەمەزانی پیرۆز دەدرێت.