سەردێر

فڕۆكەخانەی نێودەوڵەتیی هەولێر گەشتیاران ئاگاداردەكاتەوە

خەڵك

بەڕێوەبەرایەتیی گشتیی فڕۆكەخانەی نێودەوڵەتیی هەولێر ڕایدەگەیەنێت، گەشتەكانی فڕۆكەخانە بەردەوامن و ڕاگەیاندنی قەدەغەی هاتووچۆ ئەو گەشتیارانە ناگرێتەوە كە بەنیازن گەشت بكەن یان دەگەڕێنەوە.

فڕۆكەخانەی نێودەوڵەتی هەولێر لە ڕاگەیەنراوێكدا داوای لە گەشتیاران كردووە، لەكاتی دیاریكراوی خۆیدا لە فڕۆكەخانە ئامادە بن، “لەبەر ئەوەی دوای دەستپێكردنی قەدەغەی هاتووچۆ، بە هەبوونی تیكتی گەشتكردن، گەشتیار ڕێگەپێدراو دەبێت بۆ هاتووچۆكردن بۆ فڕۆكەخانە”.

كاتژمێر 08:00ـی ئەمشەو 8-4-2021، قەدەغەی هاتووچۆ لە هەرێمی كوردستان چووە بواری جێبەجێكردنەوە كە بڕیارە تا ڕۆژی 12-4 بەشێوەی نیمچەیی بەردەوام بێت.

دەقی ڕاگەیەنراوەكە:

ئاگاداری گشت هاووڵاتیان و گەشتیارانی بەڕێز دەكەینەوە كە گەشتەكان لە فڕۆكەخانەی نێودەوڵەتیی هەولێر بەشێوەی ئاسایی بەردەوامە و گەشتەكان لە كاتی خۆیاندا ئەنجام دەدرێن.

قەدەغەی هاتووچۆ ئەو گەشتیارانە ناگرێتەوە كەوا گەشت دەكەن یان دەگەڕێنەوە، بۆیە تكایە لەكاتی دیاریكراوی گەشتەكاندا لە فڕۆكەخانە ئامادە بن. دوای دەستپێكردنی كاتی قەدەغەی هاتووچۆ، بە هەبوونی تیكتی گەشتكردن، هاتووچۆ بۆ فڕۆكەخانە رێگەپێدراو دەبێت.

بەڕێوەبەرایەتیی گشتیی فڕۆكەخانەی نێودەوڵەتیی هەولێر