سەردێر

ماکرۆن و بارزانی لە کۆشکی ئیلێزێ یەک دەبینن

خەڵک

نوێنەری حکومەتی هەرێمی کوردستان، ئامانجی کۆبوونەوەی نێچیرڤان بارزانی و ئیمانوێل ماکرۆنی ئاشکراکرد، کە قسەکردنە لەسەر داهاتووی عێراق و هەرێمی کوردستان و ناوچەکە.

دەشڵێت “ئەو عێراقەی ئەوروپا و فەرەنسا دەیانەوێت هێشتا دانەمەزراوە، بۆیە چاویان لە نێچیرڤان بارزانییە رۆڵی هەبێت لە دروستکردنی عێراقێکی دیموکراسیدا”.

عەلی دۆڵەمەری، نوێنەری حکومەتی هەرێمی کوردستان لە فەرەنسا بە کەناڵی ڕووداوی وتووە؛بەپێی ئەو کارنامەیەی راگەیێندراوە، ئیمانوێل ماکرۆن، سەرۆکی فەرەنسا کاتژمێر 14:20 خولەکی ئەمڕۆ لە کۆشکی ئێلیزێ پێشوازی لە سەرۆکی هەرێمی کوردستان دەکات، کۆبوونەوەی دووقۆڵییان دەبێت و نانی نیوەڕۆش پێکەوە لە کۆشک دەخۆن.

عەلیدۆڵەمەری دەڵێت “لەم کاتەدا کە ئەوروپا و فەرەنسا بەتایبەتی لە بارودۆخێکی خراپی بڵاوبوونەوەی کۆرۆنادان و سەرۆک ماکرۆن زۆر بە کەمی میوان دەبینێت، بەڵام ئەو بانگێشتە و کۆبوونەوە و نانخواردنە لەگەڵ نێچیرڤان بارزانی بایەخپێدانی ماکرۆن بە دۆستایەتییەکەی لەگەڵ نێچیرڤان بارزانی دەردەخات”.

 

کۆبوونەوەکەی ئەمڕۆی کۆشکی ئیلیزێ، چوارەم دیداری ماکرۆن و نێچیرڤان بارزانی دەبێت لەماوەی کەمتر لە چوار ساڵدا، کە سێ جاریان لە پاریس و جارێکیش لە بەغدا بووە.

لە بەشێکی دیکەی قسەکانیدا دۆڵەمەڕی وتی: “فەرەنسا دەیەوێت جارێکی دیکە رۆڵی خۆی لە عێراقدا بگێڕێتەوە، لە دوای 2003 و بەتایبەت دوای هاتنە سەرکاری نیکۆلاس سارکۆزی فەرەنسا دەستی بەو هەوڵە کردووە و لە سەردەمی ماکرۆن هەوڵەکان زیاتر چڕبوونەتەوە، ئەوەش لە شەڕی داعشدا بەروونی دەرکەوت، چونکە فەرەنسا دەیەوێت عێراق سەقامگیر بێت و وەبەرهێنان لە بوارەکانی ئابووری و کولتووری لە عێراقدا بکات. ئەمڕۆش لە کۆبوونەوەی هەردوو سەرۆکدا سەقامگیریی عێراق و هەرێمی کوردستان تەوەری سەرەکی دەبێت”.

عەلی دۆڵەمەری روانگەی پاریسی بۆ عێراق خستەڕوو و وتی: “فەرەنسا مەبەستیەتی عێراقێکی دیموکراسی دابمەزرێت و بەجیددی هەوڵ بۆ ئەوەدەدات، چونکە ئەو عێراقەی کە ئەوروپا و فەرەنسا بەتایبەتی دەیانەوێت هێشتا دروستنەبووە، فەرەنسا چاوی لەوەیە نێچیرڤان بارزانی رۆڵی هەبێت لە دروستکردنی ئەو عێراقەدا، کە هەرێمی کوردستانیش بە بەهێزیی تێدا بمێنێتەوە”.

 

کۆبوونەوەی دووەمی سەرۆکی هەرێمی کوردستان لەگەڵ ژان ئێف لۆدریان، وەزیری دەرەوەی فەرەنسا دەبێت لە کاتژمێر 19:30 خولەک بە کاتی هەرێمی کوردستان، دواتریش سەرۆکی شارەوانی فەرەنسا دەبینێت، کە خۆی بە دۆستی کورد دەزانێت و ماوەیەکە دەستبەکاربووە، خۆی داوایکردووە سەرۆکی هەرێمی کوردستان سەردانی ئەویش بکات، نێچیرڤان بارزانیش ئەو داوایەی قبووڵکردووە.