سەردێر

“هەر كاربەدەستێك مامەڵە لەگەڵ هەڵەبجە نەكات، دەچێتە بابی شەخسیەوە”

 

خەڵك-

پارێزگاری پێشووی هەڵەبجە ڕایدەگەیەنێت، بەدەستێكی زۆر بەهێز لەهەڵەبجە دراوە، دەبێت بەدەستێكی زۆر بەهێزیش ئاوەدان بكرێتەوە.

عەلی عوسمان پارێزگاری پێشووی هەڵەبجە بە دەنگی ئەمریكای ڕاگەیاند، هەندێك كەس دەڵێن حساب بۆ هەڵەبجە ناكرێت، یان دەڵێن بەغدا تائێستا ئیعترافی پێنەكردووە، بەڵێ بەغدا ئیعترافێكی تەواوەتی كردووە بەپارێزگابوونی هەڵەبجە، چونكە ئەگەر ئیعترافی بەغدا نەبێت بۆ بەپارێزگابوونی هەڵەبجە، لەسەردەمی مندا ڕۆیشتوومەتە وەزارەتی ناوخۆ فەرمانی دەكردنی پلاكی ئۆتۆمبێلم هێناوەتەوە لەگەڵ خۆمدا كە نوسراوە عێراق- هەڵەبجە، فەرمانی دروستكردنی پاسپۆرتم هێناوەتەوە كەنوسراوە ڕەزامەندین بەكردنەوەی بەڕێوەبەرایەتی پاسپۆڕتی پارێزگای هەڵەبجە، پۆلیسی فیدڕاڵیم هێناوەتەوە ناو هەڵەبجە، لەبەرئەوە ئەم فەرمانگە فیدڕاڵیانەی كەسەر بە حكومەتی عێراقین، حكومەتی عێراقی وەكو پارێزگا مامەڵەی لەگەڵ كردوون.

وتیشی”حكومەتی هەرێم كاری خۆیەتی لەپەڕلەماندا لەساڵی 1999 ئەوان بڕیاریان لێداوە هەڵەبجە وەكو پارێزگا بێت و وەكو پارێزگا مامەڵەی لەگەڵدا كردووە، هەر كاربەدەستێكی حكومەتی هەرێمی كوردستان لەسەرەوە بۆ خوارەوە بەشێوازێك لە شێوازەكان ئەگەر مامەڵە لەگەڵ هەڵەبجە نەكات ئەوە دەچێتە بابی شەخسیەوە ئەگەرنا حكومەتی هەرێمی كوردستان وەكو پارێزگا مامەڵەی لەگەڵ هەڵەبجەدا كردووە”.

ئاشكراشیكرد، ئەگەر ئەم قەیرانی دارایی و ئەم ئاڵۆزیە سیاسیانەی هەندێكجار كەدێن نەبوایە زۆر شتی هەڵەبجە بەرەو پێشتر دەڕۆیشت لەوەی كە ئێستا هەیە.

سەبارەت بە نەخۆشخانەی بەركەوتووانی كیمیاباران ناوبراو ڕایگەیاند، لەسەردەمی من ویسترا ئەو نەخۆشخانەی كیمیابارانی هەڵەبجە بكرێتەوە، بەڵام نەمهێشت، پێشتریش ئاماژەم پێدا تاوەكو ئەو نەخۆشخانەیە بەتەواوەتی تەواو نەكرێت و پێداویستییە تەندروستیەكانی بۆ دابین نەكرێت لەشوێن و ئامێری پشكنینی پزیشكی و ئەوانە، دواتر تاوەكو دكتۆری تایبەتمەند لەئەوروپا بێت یاخود لەئێران بێت كەشارەزای نەخۆشیەكانی چاو و سنگ و پێست نەبێت، ئەمانە نەبێت ڕێگە بەكردنەوەی ئەو نەخۆشخانەیە نەدەین، خۆشبەختانە دوو قۆناغیمان بڕیوە ئێستا هاتوینەتە سەرئەوەی وەزارەتی تەندروستی لەگەڵ وەزارەتی شەهیدان هەتا ئەو نەخۆشخانەیە پزیشكی لەدەرەوە بۆ نەهێنرێت بەبڕوای من ئیكتیفای زاتیمان نییە كە ئەو نەخۆشخانەیە تەنها بۆ بریندارانی چەكی كیمیایی هەڵەبجە نییە بۆ بریندارانی چەكی كیمیایی سەرجەم كوردستانە هیوادارم لەسەردەمی مندا توانیبێتم ئەو دوو قۆناغە ببڕم.

ڕوونیشیكردەوە، لەڕاستیدا هاوكاری بەركەوتووانی هەڵەبجە كراون لەلایەن حكومەتی هەرێمی كوردستانەوە، حكومەت ئەوەی لەتوانایدا بووبێت بۆ نموونە كەسوكاری شەهیدان یاخود ناردنەدەرەوەی بریندارەكان ئەوەی كردووە، بەڵام وەكو پێویست نەبووە و لەئاستی پێویستدا نەبووە.

جەختی لەوەش كردەوە، بەداخەوە كەرتی تەندروستی لەوڵاتی ئێمە بەڕاستی بەشێوازێك بەڕێوەدەبرێت كە هەر مەسەلەی برینداری چەكی كیمیایی نییە لەهەموو كوردستاندا كەرتی تەندروستی دەتوانم بڵێم لەقەیرانێكی قوڵدایە، لەبەرئەوە كۆمەڵێك هۆكار هەیە تاوەكو ئێستا لەسەر ئەو سیستەمی بەڕێوەبردنە دەڕۆین، ئەمە دەبێت قابیلی چارەسەركردن بێت.