سەردێر

لاهور شێخ جەنگی مەرجی مانەوەی یەكێتی لە كابینەی 9 ئاشكرادەكات

خەڵك
هاوسەرۆكی یەكێتیی نیشتیمانیی كوردستان ڕایدەگەیەنێت، بە گرتنەبەری سیاسەتێكی ژیرانە و حەكیمانە دەبێت سەنگ و قورسایی كورد لە بەغدا بەهێز بكەین، بەم شێوازی سیاسەتكردنەی كە ئێستا لە هەرێم دەگوزەرێت زەرەرمەندی یەكەم تیایدا میللەتەكەمان دەبێت، دەشڵێت،” سوورین لەسەر جێبەجێكردنی لامەركەزیی و مەرجی مانەوەمانە لەم كابینەیەدا”.

لاهور شێخ جەنگی، هاوسەرۆكی یەكێتیی نیشتیمانیی كوردستان ئەمڕۆ دووشەممە ١٥ـی ٣ـی٢٠٢١، لە بارەگای مەكتەبی سیاسی لە شاری سلێمانی، لەگەڵ سەرجەم كۆمەڵە و رێكخراو و سەندیكاكانی سەر بە مەكتەبی ڕێكخراوە دیموكراتییەكانی یەكێتیی نیشتیمانیی كوردستان كۆبووەوە.

لاهور شێخ جەنگی باسی لە نەخشەی سیاسیی عێراق كرد لە ئێستادا و جەختی لە ڕۆڵ و پێگەی كورد كردەوە لەو نەخشەیەدا و ڕایگەیاندووە، ئەمە بە گرتنەبەری سیاسەتێكی ژیرانە و حەكیمانە دەبێت و لەو ڕێگەیەشەوە سەنگ و قورسایی كورد لە بەغدا بەهێز دەكەین، چونكە بەم شێوازی سیاسەتكردنەی كە ئێستا لە هەرێم دەگوزەرێت زەرەرمەندی یەكەم تیایدا میللەتەكەمان دەبێت.

باسی لەوەشكردووە، كە دەیانەوێت لامەركەزی لە هەموو پارێزگاكانی هەرێم جێبەجێ بكرێت نەك تەنیا لە پارێزگای سلێمانی، چونكە لامەركەزی قەوارەی هەرێم بەهێز دەكات و یەكسانی و هاوسەنگی لە نێوان سەرجەم پارێزگاكان دروست دەكات و لەو ڕێگەیەشەوە خزمەتگوزاریی زیاتر و باشتر پێشكەش بە هاووڵاتییانی هەرێم دەكرێت هەر بۆیە سوورین لەسەر جێبەجێكردنی ئەو داواكارییە كە مەرجی مانەوەمانە لەم كابینەیەدا.

دەقی ڕاگەیەنراوەكە :

ئەمڕۆ دووشەممە ١٥ـی ٣ـی٢٠٢١، لاهور شێخ جەنگی هاوسەرۆکی یەکێتیی نیشتیمانیی کوردستان، لە بارەگای مەکتەبی سیاسی لە شاری سلێمانی، لەگەڵ سەرجەم کۆمەڵە و رێکخراو و سەندیکاکانی سەر بە مەکتەبی ڕێکخراوە دیموکراتییەکانی یەکێتیی نیشتیمانیی کوردستان کۆبووەوە. لەو کۆبوونەوەیەدا کە هەریەک لە د.میران محەمەد لێپرسراوی مەکتەبی ڕێکخراوە دیموکراتییەکان و فەهمی بورهان لێپرسراوی بۆردی ڕێکخراوە پیشەییەکان و ژینۆ محەمەد لێپرسراوی بۆردی ڕێكخراوە جەماوەرییەکان ئامادەی بوون، لاهور شێخ جەنگی دیدگا و بڕیاری سیاسیی یەکێتیی نیشتیمانیی کوردستانی بۆ ئامادەبووان خستە ڕوو لەسەر کۆی پرسەکانی تایبەت بە دۆخی سیاسی و ئابوریی عێراق و هەرێمی کوردستان و خۆسازدان بۆ هەڵبژاردنەکانی داهاتوو. هاوسەرۆک لاهور شێخ جەنگی باسی لە نەخشەی سیاسیی عێراق کرد لە ئێستادا و جەختی لە ڕۆڵ و پێگەی کورد کردەوە لەو نەخشەیەدا و وتی ئەمە بە گرتنەبەری سیاسەتێکی ژیرانە و حەکیمانە دەبێت و لەو ڕێگەیەشەوە سەنگ و قورسایی کورد لە بەغدا بەهێز دەکەین، چونکە بەم شێوازی سیاسەتکردنەی کە ئێستا لە هەرێم دەگوزەرێت زەرەرمەندی یەکەم تیایدا میللەتەکەمان دەبێت. لاهور شێخ جەنگی ئاماژەی بە گرنگیی ڕێککەوتنی نێوان هەرێم و بەغدا کرد لەسەر بودجە و دووپاتی کردەوە کە ڕێککەوتنەکەمان تەنیا بۆ بودجە نابێت، بەڵکو چەندین کێشەی ترمان هەیە لەسەرویانەوە کێشەی کەرکوک و ناوچە دابڕێندراوەکانە، کە ئەویش لە ڕێگەی پەنابردنە بەر دەستوور و خەباتی سیاسی و پەرلەمانییەوە چارەسەر دەبێت. لەو ڕووەشەوە ئاماژەی بە هەوڵ و هەنگاوەکانی یەکێتیی نیشتیمانیی کوردستان کرد لە بەغدا لەگەڵ لایەنە سیاسییە عێراقییەکان و ڕایگەیاند ئەو هەنگاوانەمان لە پێناو بەرژەوەندیی گشتیی میللەتەکەمان و ڕزگارکردنیانە لە برسێتی و دابینکردنی مووچەی مووچەخۆران. لاهور شێخ جەنگی باسی مەلەفی نەوتی هەرێمی کرد و ڕایگەیاند ئەو مەلەفە شەفافییەتی تێدا نییە و پێویستە چاکسازییەکی تەواوی تێدا بکرێت و هەڵوێستی یەکێتیی بۆ ئەو مەلەفە ڕوونکردەوە کە بەستنەوەیەتی بە بەغداوە. لە بارەی پرسی لامەرکەزییەوە جەختی کردەوە کە ئەو پرسە پەیوەندیی ڕاستەوخۆی بە هەرێمی کوردستانەوە هەیە و وتی؛ دەمانەوێت لە هەموو پارێزگاکانی هەرێم جێبەجێ بکرێت نەک تەنیا لە پارێزگای سلێمانی، چونکە لامەرکەزی قەوارەی هەرێم بەهێز دەکات و یەکسانی و هاوسەنگی لە نێوان سەرجەم پارێزگاکان درووست دەکات و لەو ڕێگەیەشەوە خزمەتگوزاریی زیاتر و باشتر پێشکەش بە هاووڵاتییانی هەرێم دەکرێت هەر بۆیە سوورین لەسەر جێبەجێکردنی ئەو داواکارییە کە مەرجی مانەوەمانە لەم کابینەیەدا. لە بەشێکی تری وتەکانیدا لاهور شێخ جەنگی باسی دۆخی ناوخۆی یەکێتیی کرد و جەختی لەو سیاسەتە کردەوە لە دوای کۆنگرەوە یەکێتیی پەیڕەوی دەکات بۆ ژیانی حزبی و ڕێکخراوەیی کە ئەویش گرنگیدانە بە جەماوەر، چونکە بڕیارەکانی یەکێتیی هەڵقوڵاوی خواست و داواکارییەکانی جەماوەرە. دواتر هاوسەرۆکی یەکێتیی نیشتیمانیی کوردستان بە وردی گوێی بۆ سەرنج و تێبینی و داواکاری و پرسیاری ئەندام و کادران گرت لە سەرجەم کۆمەڵە و سەندیکاکان و وەڵامی پێویستی دانەوە، هاوکات سوپاسی کردن بۆ ئەو جۆشوخرۆشەی کە هەیانە بۆ سەرخستنی حزبەکەیان و خزمەتکردنی کۆمەڵانی خەڵکی کوردستان، داواشی لێکردن کە بە گیانێکی هەڤاڵانەوە خۆیان ساز بدەن بۆ هەڵبژاردنی داهاتوو، بە تایبەت لە کەرکوک و ناوچە دابڕێندراوەکان.

 



هەلبژاردە

گرنگترینەکان