سەردێر

لە یادی كیمیابارانی هەڵەبجە یاداشتێك درایە ئەڵمانیا

خەڵك-ئارام سەردار

لەیادی كارەساتی جەرگبڕی هەڵەبجە، ژمارەیەك لەڕێكخراوەكانی كۆمەڵی مەدەنی یاداشتێك ئاڕاستەی سەرۆكایەتییەكانی ئەڵمانیا و باڵیۆز و كونسوڵی ئەو وڵاتە لەعێراق و هەرێم دەكەن و داوا دەكەن حكومەتی ئەڵمانیا بە فەرمی دان بە تاوانەكانی جینۆسایدی كورددا بنێت و حكومەتی عێاقیش بەفەرمی داوای لێبوردن بكات.

مەغدید حاجی، یاداشتی ڕێكخراوەكانی خوێندەوە و ڕایگەیاند، بەهۆی ئەوەی كۆمپانیاكانی ئەڵمانیا هاوشان لە گەڵ زۆربەی وڵاتانی ئەوروپا و ئەمەریكا و ژاپۆن، لە هەشتاكانی سەدەی رابردوو ڕۆڵیان هەبووە لە فرۆشتنی چەكی كیمیاوی بە ڕژێمی بەعسی روخاو ئەویش ئەو چەكانەی لە قەڵاچۆكردنی هاووڵاتیانی كوردستان بەكارهێناو ئاكامەكەشی دەیان هەزار هاووڵاتی سڤیل بوونە قوربانی, نموونەیەكی دیاری تاوانەكانیش كیمیابارانكردنی شاری هەڵەبجە بوو كە لە رێكەوتی 16-3-1988 لە لایەن رژێمی بەعسەوە كیمیابارانكرا بە چەكی وڵاتانی پێشكەوتوو، كە تا ئێستاش سەدان لەو قوربانیانە كە بە چەكەكانی ئەو وڵاتانە كیمیابارانكران بەدەم ئازارەوە دەتلێنەوە, ناوە ناوەش بە مردنی هەر یەكێكیان ژمارەی تازە دەخەنە سەر 5000 شەهیدەكەی هەڵەبجە.

دەشڵێت، هەر بەهۆی ئەو تاوانەشەوە شاری هەڵەبجە چووە پەرتووكی گینسەوە وەك یەكەم شار لە مێژووی مرۆڤایەتی زۆرترین قوربانی سڤیلی دابێت بە چەكی كیمیاوی، وێڕای ئەوەی سوپاسی ئەڵمانیا دەكەین كە هەڵوێستی باشیان هەبووە لە مامەڵەكردنی مرۆڤدۆستانە لە گەڵ پەنابەرانی ئێزیدی و هاوكاری پێشمەرگە لە شەڕی دژ بە تیرۆریستانی داعش.

ئەوەشی خستەڕوو، داوا دەكەین، حكومەتی ئەڵمانیا بە فەڕمی دان بە تاوانەكانی جینۆسایدی كورددا بنێت كە دادگای باڵای تاوانەكانی عێراقی دانی پێدا ناوە, هاوكات تاوانی جینۆسایدی ئێزیدی و كریستانەكان و شەبەك كە هێزی تیرۆریستی داعش ئەنجامی دا، حكومەتی ئەڵمانیا بەشداری بكات لە كەمكردنەوەی ئازاری بریندارانی چەكی كیمیاوی لە كوردستان بە چارەسەركردنی بریندارەكان لە وڵاتی ئەڵمانیا، و لە بڕی ئەوەی ڕۆژانە ڤیزا دەدەن بە بارزرگانان و دەوڵەمەندان و بەرپرسانی ئەم وڵاتە و كارئاسانیان بۆ دەكەن بۆ گەشتكردن، ڤیزا بدەن بە بریندارەكانمان بۆ چارەسەركردنی پزیشكی لە وڵاتەكەتان، و ژمارەیەك كورسی خوێندن بۆ منداڵانی برینداری كیمیاوی لە زانكۆكانتان تەرخان بكەن.

لای خۆشیەوە هیوا سەید سەلیم چاودێر و چالاكی سیاسی ڕایگەیاند، داوا دەكەین عیراق ببێتە ئەندامی دادگای تاوانی نێودەوڵەتی و قەرەبووی قوربانیان بكاتەوە، بەفەڕمی داوای لێبوردن لەگەلی كورد بكات، هیچ لێبوردنێكیش بۆ تاوانبارانی ئەو كارەساتە نەبێت.

No description available.

No description available.

No description available.