سەردێر

قەرەچووغ.. هاوپەیمانان 27 مۆڵگەی تیرۆریستانیان بۆردوومانكرد

خەڵك

فڕۆكە جەنگییەكانی هاوپەیمانان 27 مۆڵگەی تری تیرۆریستانی داعشیان لە سنووری چیای قەرەچووغ بۆردوومانكرد.

سیروان بارزانی، لێپرسراوی میحوەری گوێڕ – مەخمووری پێشمەرگە ڕایگەیاند، لە بەرەبەیانی ئەمڕۆ هەینییەوە تا دوای نیوەڕۆ، فڕۆكە جەنگییەكانی هاوپەیمانان 27 مۆڵگە و حەشارگەی تری داعشیان لە چیای قەرەچووغی سنووری قەزای مەخموور بۆردوومانكردووە.

سیروان بارزانی وتیشی، “زیانە گیانییەكان نەزانراون، بەڵام مۆڵگە و حەشارگەكانیان خاپووركراون و چەك و تەقەمەنییەكانیشیان لەنێوبراون”.

لێپرسراوی میحوەری گوێڕ – مەخمووری پێشمەرگە باسی ئەوەشی خستەڕوو، بۆردوومانەكان بەردەوام دەبن “تا ئەوكاتەی دڵنیادەبینەوە لەوەی كە هیچ بنكە و سەنگەرێكی داعش لەو سنوورە نەماوە”.

جێی ئاماژەیە، لە ڕۆژانی چوارشەممە و پێنجشەممەی ڕابردووش، فڕۆكە جەنگییەكانی هاوپەیمانان 28 جار داعشیان بۆردوومانكرد و 10 مۆڵگەیان خاپووركرد.