سەردێر

داعش دەچێتە ناو چەند گوندێك نزیك ڕێگەی كەركوك -هەولێر

خەڵك-
فەرماندەیەكی پێشمەرگە لە كەركوك ڕایدەگەیەنێت، چەكدارانی داعش دزەیان كردۆتە نێو هەندێك گوندی نزیك ڕێگەی سەرەكی كەركووك-ھەولێر و دەشڵێت: “دزەكردنی چەكدارانی داعش بۆ ناوچەكە بۆ پەیداكردنی نان و پێداویستی بووە”.

لیوا حەمە ڕێگر، فەرماندەی فەرماندەیی كەركوك لە پشكی پارتی بە ماڵپەڕی فەرمی حزبەكەی ڕاگەیاندووە، ژمارەیەك چەكداری داعش دزەیان كردۆتە نێو گوندەكانی نزیك شەقامی سەرەكی كەركووك-ھەولێر و هاووڵاتییانی ناوچەكە بە چاوی خۆیان ئەو چەكدارانەیان بینیوە لە گوندی شانشین.

وتیشی، “هۆكاری دزەكردنی ئەو چەكدارانە بۆ ئەوە دەگەڕێتەوە ناوچەكە هەندێك جووتیاری عەرەبی تێدایە و هاوسۆزن لەگەڵ داعش لەبەر ئەوەش چەكداران بۆ پەیداكردنی نان و پێداویستی خۆیان دەخزێنە نێو ئەو گوندانە”.

ڕاشیگەیاندووە، ئەو ناوچانە پێشتر داعشی تێدا نەبووە، چونكە زۆرینەی خەڵكی ناوچەكە كوردن و هەندێ گوندی عەرەبیش هەیە لە نێوان دوبز و ناوچەكە، پێشتر هێزی پێشمەرگە لە بەرزاییەكانی كانی دومەڵان جێگیر كرابوو، كە ئێستا پێشمەرگەی تێدا نییە، داعش بە دەرفەتی زانیوە بێتە ناوچەكە.

ئاماژەی بەوەشكردووە، داعش ئەوەندە بەهێز نییە مەترسی بنێتەوە، لەگەڵ ئەوەشدا خەڵكێكی زۆر هەیە لە عەرەبەكانی ناوچەكە پێشتر داعش بوونە و ئێستا لەنێو ڕیزەكانی حەشدی شەعبیدان و هەر بۆیان هەڵكەوێت بە نان و چەك و ئۆتۆمبێلی حكوومەت هاوكاری داعش دەكەن.