سەردێر

بڕیار لەسەر داخستنی خوێندنگەكان و پڕۆسەی خوێندن دەدرێت

خەڵک-ئارام سەردار
وەزیری پەروەردەی حكومەتی هەرێم ئاشكرای دەكات، لیژنەی باڵای ڕووبەڕووبوونەوەی كۆرۆنا كۆدەبێتەوە و هەڵسەنگاندن بۆ دۆخی تەندروستی خوێندنگەكان دەكات و دەشڵێت: “هەر بڕیارێك بدرێت بە داخستنی خوێندنگەكان ئەوا پابەند ئەبن پێوەی”.

ئالان حەمە سەعید، وەزیری پەروەردەی حكومەتی هەرێم لە لێدوانێكی ڕۆژنامەوانیدا، كە پەیامنێری (خەڵك) ئامادەی بوو ڕایگەیاند، لیژنەی باڵای ڕووبەڕووبوونەوەی كۆرۆنا كۆدەبێتەوە و هەڵسەنگاندن بۆ دۆخی تەندروستی ناوەندەكانی خوێندن دەكات و بڕیار لەبارەی پڕۆسەی خوێندن دەدرێت.

ڕاشیگەیاند، ئەوەی تایبەتمەندە بە داخستنی دەرگای خوێندنگەكان یان بەردەوام بوونی خوێندن وەزارەتی تەندروستییە و ئەگەر بڕیار بدرێت ئێمە پابەند دەبین و ئەگەر بۆ ماوەیەكی كاتی-ش بێت لەپێناو پاراستنی خوێندكاران ئەوا وەك وەزارەتی پەروەردە دەرگای خوێندنگەكان دادەخەین.

وتیشی، “ئەگەر ئامارەكانی توشبوون ڕوو لەهەڵكشان بكات ئەوا بۆ داخستنەوەی دەرگای خوێندنگەكان لیژنەی باڵای كۆرۆنا بڕیار دەدات، خۆ ئەگەر پێشمان بڵێن بەخۆپارێزی توندترەوە بەردەوامبن ئەوا پڕۆسەی خوێندن بەردەوام دەبێت”.