سەردێر

عەمار حەكیم پشتگیری شێخ نەهرۆ دەكات

عەمار حەكیم پشتگیری خۆی بۆ داواكەی شێخ نەهرۆ سەبارەت بە چارەسەركردنی كێشەی مووچەی فەرمانبەرانی هەرێم ڕاگەیاند.


عەمار حەكیم سەرۆكی ڕەوتی حیكمە ڕایگەیاند، پشتگیری لەداواكەی شێخ نەهرۆ محمد كەسنەزانی سەرۆكی تەریقەتی قادری كەسنەزانی لەجیهاندا دەكات بۆ چارەسەركردنی كێشەی مووچەی فەرمانبەرانی هەرێمی كوردستان.

عەمار حەكیم سەردانی تەكیەی سەرەكی كەسنەزانی لەسلێمانی كرد و لەگەڵ شێخ مەڵاس محەمەد كەسنەزانی برای شێخ نەهرۆ كۆبووەوە و ڕایگەیاند،”هەردوولا باسیان لە چارەسەركردنی قەیرانی ئابووری و دارایی هەرێمی كوردستان و شایستە دارایەكانی كورد لە بودجەی عێراق كردووە و پێداگریشیان كردووە لەسەر چارەسەركردنی كێشەی مووچەی فەرمانبەرانی هەرێمی كوردستان”.

وتیشی: “مەبەستی سەردانەكەم بۆ بەدەنگەوە هاتنی داواكارییەكەی شێخ نەهرۆ بوو كە ڕایگەیاندبوو مەرجەعی ئایینی كەسنەزانی بەهاوكاری مەرجەعە ئاینییەكانی تر چارەسەری قەیرانی ئابووری و دارایی كورد و مووچەی فەرمانبەرانی هەرێمی كوردستان دەكەین”.

عەمار حەكیم ڕوی دەمیكردە تەریقەتی كەسنەزانی و ڕوونیكردەوە، “ئێوە كەسانی شیاون لەشوێنی شیاو و خۆتان خاوەن ماڵن و خۆتان باشتر دەزانن چی لەناو ماڵەكەدا دەگوزەرێت و ئێمەش دەست دەخەینە ناو دەستی ئێوە و هاوكارتان دەبین لەخزمەتكردنی وڵات و بەرژەوەندییەكانی گەلەكەمان”.

پێشتر شێخ نەهرۆ محەمەد كەسنەزانی سەرۆكی تەریقەتی قادری كەسنەزانی لەجیهاندا بەڵێنی چارەسەركردنی مووچەی فەرمانبەرانی هەرێمیدا و ڕوونیكردەوە، مەرجەعی تەریقەتی كەسنەزانی بەرپرسیاریەتی چارەسەركردنی كێشەی كوردی گرتووەتە ئەستۆی خۆیی و لەگەڵ مەرجەعە ئاینییەكانی تردا بەردەوام لەپەیوەندیدا دەبێت بۆ ڕزگاركردنی كورد لەو قەیرانەی تێی كەوتووە، دووپاتیشیكردەوە، چارەسەری قەیرانی كورد كەوتووەتە دەستی دەسەڵاتی ئاینی و لەژێر كۆنتڕۆڵی دەسەڵاتی سیاسی دەرچووە.

خەڵك – بەشی هەواڵ