سەردێر

“لە پارێزگای هەولێر 304 ئافرەت هانایان بۆ ماڵی ئافرەتانی هەڕەشەلێكراو هێناوە”

خەڵك-

بەڕێوەبەری گشتی چاودێری و گەشەپێدانی كۆمەڵایەتی هەولێر ڕایدەگەیەنێت، لە ساڵی 2020 لە سنووری پارێزگای هەولێر 304 ئافرەت هانایان بۆ ماڵی ئافرەتانی هەڕەشەلێكراو هێناوە.

ئەمڕۆ شەممە 20ـی شوبات، یوسف چاوشین بەڕێوەبەری گشتی چاودێری و گەشەپێدانی كۆمەڵایەتی هەولێر لە كۆنفڕانسێكی ڕۆژنامەوانیدا ئاماری ساڵانەی كارو چالاكییەكان ڕاگەیاندن و ئاماژەی بۆ ئەوە كرد، لە ساڵی 2020 لە سنووری پارێزگای هەولێر 304 ئافرەت هانایان بۆ ماڵی ئافرەتانی هەڕەشەلێكراو هێناوە و لەو ژمارەیە تەنها 41 ژن لە ماڵەكە ماون.

باسی لەوەشكرد، لە خانەی بەساڵاچوون لە ساڵی 2020 ژمارەی بەساڵاچووان 190 بەساڵاچوو بووە و لەو ژمارەیە تەنها 67 بەساڵاچوو ماوە و ژمارەی ئافرەتان 26 ئافرەت بووە و ژمارەی پیاوان 41 بوو.

ئاشكراشیكرد، لە خانەی نەوجەوانانی كوڕان و كچان لە ساڵی 2020 بریتی بووە لە 59 منداڵ كە پێكهاتووە لە 32 كوڕ و 27 كچ ژمارەی ئەو منداڵانەشی لە دەرەوەی خانە بریتیە لە 210 منداڵ، هەروەها حكومەتی هەرێمی كوردستان بڕی 540 ملیۆن دیناری بۆ منداڵانی كچان و كوڕانی خانەكان و بەساڵاچووان و خۆراك و پێداویستییەكان خەرج كردووە.

ڕوونیشیكردەوە، لە ساڵی 2020 لە سنووری پارێزگای هەولێر 1318 منداڵ پەیوەندییان بەهێڵی 116 تایبەت بە منداڵان كردووە كە زۆرترینیان كێشەی قوتابخانەیان هەبووە لەو ژمارە پەیوەندیكردنەش تەنها 500 پەیوەندییان ڕاستەقینە بوونە.

ناوبراو ڕاشیگەیاند، لە ساڵی 2020 لە سنووری پارێزگای هەولێر بەشێوەیەكی گشتی 102 دایەنگە هەیە كە 3 یان حكومین و 99 یان ناحكومین و ژمارەی منداڵانی سوودمەند بریتین لە 874 منداڵ، بەڵام پێش بڵاوبوونەوەی ڤایرۆسی كۆرۆنا 2893 منداڵ سوودمەند بوون.

لەبارەی هاوكارییەكانی حكومەتی هەرێمی كوردستان لە سنووری پارێزگاری هەولێر بەڕێوەبەری گشتی ڕایگەیاند، چوار جۆر هاوكاری دابەشكراوە و یەكەم بڕە خۆراك بریتی بوو لە 4600 تۆن خۆراك بەسەر 70 هەزار خێزان دابەشكراوە، لە قۆناغی دووەم بڕی 5687 تۆن خۆراك بەسەر 107 هەزار خێزان دابەشكراوە و لە قۆناغی سێیەم بڕی چوار ملیار و 900 ملیۆن دینار بەسەر 49 هەزار خێزان دابەشكراوە و لە قۆناغی چوارەم تایبەت بە دابەشكردنی نەوت بوو بڕی شەش ملیۆن و 640 هەزار لیتر نەوتی خێرخوازی بەسەر 33 هەزار و 200 خێزان دابەشكراوە.