سەردێر

موراد قەرەیلان؛ توركیا لە هێرشی ئەم زستانەی شكستی هێنا

خەڵك-
ئەندامی كۆمیتەی بەڕێوبەری پارتی كرێكارانی كوردستان ڕایدەگەیەنێت ، توركیا بە پشتیوانیی ناتۆ هێرش دەكاتە سەر گەلی كورد و بزووتنەوەی ئازادیخوازی گەلی كورد و گەریلاش بەرگریی لە شەرەفی گەلەكەی دەكات و دەشڵێت، “هێرشی ئەم زستانەی دەوڵەتی توركیاش شكستی هێنا”.

موراد قەرەیلان، ئەندامی كۆمیتەی بەڕێوبەری پارتی كرێكارانی كوردستان لە بەرنامەیەكی ڕادیۆی دەنگی وڵات دا ڕایگەیاندووە، لە كەسایەتی عەبدوڵا ئۆجالان پیلانگێڕان تەواوی گەلی كوردیان كردە ئامانج ، بەڵام بە خەبات و تێكۆشانی ئاپۆ لە ئیمرالی و كادیرانی بزووتنەوەی ئازادی خوازیی و گەل ، ئەم پیلانگێڕییە بێ ئەنجام ماوەتەوە و ئەگەرچی هێشتا لە دژی گەلی كورد بەردەوامە.

ڕاشیگەیاندووە، خەبات و بەرخۆدانی ٥٠ساڵەی عەبدوڵا ئۆجالان لە ناو كۆمەڵگادا وای كردوە، كە كورد جارێكی دیكە هەستێتەوە سەر پێ و بگاتە ئاستێك ، كە پێشەنگایەتی تاكی دیموكرات بكات ، لەسەر دەستی ئەو كەسانە داعش تێكبشكێت و مرۆڤایەتی لە گەورەترین مەترسیی ڕزگار بكرێت ، هاوكات جیهان بینی ئۆجالان وایكرد، كە ببێتە ڕزگاركەرێك بۆ هەموو گەلانی جیهان و نازناوی ماندێلای سەدەی ٢١ی پێ بدرێت.

ئاشكراشیكرد، دەوڵەتی توركیا بە پشتیوانیی ناتۆ لە دژی بزووتنەوەكەمان و گەلی كورد لەژێر ناوی شەڕی تیرۆردا شەڕ دەكات ، بەڵام تیرۆریستی ڕاستەقینە خودی دەوڵەتی توركە، كە هیچ سنوورێكی مرۆڤایەتیی نەپاراستووە، ئەوەش گەریلایە، كە بەرگریی لە شەرەفی گەلەكەی دەكات.