سەردێر

دەمیرتاش: بەرپرسیاریەتی كوژرانی 13 دیلەكە لە ئەستۆی دەسەڵاتی توركیایە

هاوسەرۆكی پێشووتری پارتی دیموكراتی گەلان (هەدەپە) كوژرانی 13 دیلی لە چیای گارە سەركۆنە كرد و ئۆباڵەكەشی خستە ئەستۆی دەسەڵاتی توركیا.


سەڵاحەدین دەمیرتاش لە جریوەیەكەدا لە تۆڕی كۆمەڵایەتی تویتەر نووسیویەتی، كوژرانی ئەو 13 دیلە ئیدانە دەكات كە لە چیای گارە بوون و سەرەخۆشی لە كەسوكاریان دەكات.

هاوسەرۆكی پێشووتری هەدەپە سەبارەت بە هێرشی توركیا بۆ سەر گارە ئاماژەی بەوەشداوە، لەبری گرتنەبەری ڕێگەچارەی دیپلۆماتی، ئەو ئۆپراسیۆنە بەمەبەستی نمایشی سیاسی ئەنجامدرا، لە ئەنجامدا ئەم تراژیدیایەی لێكەوتەوە، ئەمە گەمژەییە كە بەرپرسیاریەتیی تراژیدیایەكی وەها بخرێتە سەر هەدەپە و ئۆپۆزسیۆن. ئەوەی دەبێ بەرپرسیاریەتی بەرامبەر خەڵك قبوڵ بكات، دەسەڵاتە”.

دەمیرتاش ئەوەشی خستووەتەڕوو، لە بنەمادا دەبێت دژایەتیی هەموو هەلومەرجێكی وەكو چەك، توندوتیژی و شەڕبكرێت و ئاشتی فەراهەم بكرێت.

ڕۆژی 10ی ئەم مانگە توركیا هێرشێكی بۆ سەر چیای گارە لە سنووری پارێزگای دهۆك ئەنجامدا و بەهۆیەوە وەك بەرپرسانی پەكەكە ڕایانگەیاندووە، كەمپی دیلەكانی توركیا كە لە ژێر دەستی ئەو حزبە كوردستانییەدا بوون كراوەتە ئامانج و 13 دیل كوژراون.

توركیا كوژرانی ئەو دیلانە دەخاتە ئەستۆی پەكەكە، بەڵام میدیای ئەو حزبە گرتەی ڤیدیۆیی ساتی بۆردوومانی كەمپەكە و هێرشی سوپای توركیای بۆ سەر ئەو شوێنە بڵاوكردووەتەوە.

خەڵك – بەشی هەواڵ